Loksins, loksins unnu skáldin kvalara sína!

Bókmenntahátíð í Reykjavík fagnar fjörutíu ára afmæli og var því viðeigandi að um tímamótaleik væri að ræða, aðeins annar sigur rithöfunda síðustu tuttugu ár.

Rithöfundar klæddust svörtum treyjum sem voru merktar „Skáld eru aldrei rangstæð!“ og útgefendur klddust fagurbláum treyjum. Anna Lea Friðriks­dótt­ir, útgefandi hjá Sölku, var fyr­irliði út­gef­enda og Börk­ur Gunn­ars­son, leikstjóri og rithöfundur, var fyr­irliði rit­höf­unda.

Þá nutu rithöfundar þjálfunar Höllu Gunnarsdóttur, formanns VR og rithöfundar, sem sýndi mikla kænsku í skiptingum sínum og var óhrædd við að rótera liði skáldanna.

Mark sitt í hvorum hálfleiknum

Leikurinn var fimmtíu mínútna langur, tvisvar sinnum 25 mínútur, með stuttu hléi. 

Spilað var átta á átta en töluverður munur var á varamannafjölda liðanna. Útgefendur voru aðeins tíu talsins en rithöfundar nítján, tveir varamenn á móti ellefu. 

Rithöfundurinn Halldór Armand, sem nýlega stofnaði útgáfuna Flatkökuna, sá auman á fáliðuðum útgefendum og sveik lit. Fór úr svörtu í blátt. 

En hann átti eftir að sjá eftir því...

Leikurinn var afar jafn allan fyrri hálfleikinn þar til hægri bakvörðurinn Huldar Breiðfjörð gaf fallega fyrirgjöf á Einar Lövdahl sem skallaði boltann smekklega í netið. Staðan 1-0 og hún hélst þannig óbreytt út fyrri hálfleikinn.

Útgefendur voru í vígahug eftir slakan fyrri hálfleik en fengu hins vegar stóran skell snemma í þeim seinni. Hinn óþreytandi Einar Lövdahl gaf þá stungusendingu á Hjalta Hallgrímsson sem spændi sig í gegnum vörn útgefenda og skaut boltanum í fjærhornið. Staðan 2-0.

Útgefendur gáfust þó ekki upp og lágu á rithöfundum. Stefán Þ. Hermannsson, markmaður rithöfunda, varði þónokkrum sinnum stórglæsilega og tryggði rithöfundum hreint blað þegar flautan gall í lokin.

Útgefendur vinni alltaf... en ekki í ár

„Við erum í skýjunum. Þvílíkt hvað menn eru glaðir,“ sagði Börkur Gunnarsson þegar fréttastofa náði tali af honum á lokahófi Bókmenntahátíðarinnar á laugardagskvöld.

Sigurinn var umtalaður meðal gesta hátíðarinnar að sögn Barkar.

„Það er ekki verið að tala um þessi stórkostlegu skáld og rithöfunda sem hafa verið með svo flotta fyrirlestra og góðar umræður heldur um fótboltaleikinn í dag þar sem við loksins unnum útgefendur okkar sem annars vinna eiginlega alltaf; bæði í samningum og fótboltaleikjum,“ sagði hann.

Sjálfur spilaði Börkur ekki, í fyrsta skiptið í átta ár, vegna meiðsla en hann sinnti framkvæmdastjórn liðsins: smalaði skáldum saman, þreif treyjurnar, skrásetti leikinn á mynd og hvatti liðið áfram.

Ekkert tuð og engin ljóð

„Liðsheildin. Rithöfundar eru röfl- og tuðgjarnir en það var lítið um það hjá okkur í dag. Við náðum að standa saman og enginn fór út í horn að yrkja ljóð í miðjum leik,“ sagði Börkur aðspurður hver lykillinn að sigrinum hefði verið.

„Við vorum líka með fleiri á varamannabekknum. Gátum hvílst meira en þeir,“ bætti hann við.

Öfugt við leikinn í fyrra voru það ekki rithöfundarnir sem áttu erfitt með að skora.

„En þetta var jafn leikur þótt hann hafi endað 2-0 fyrir okkur. Þeir spiluðu vel og voru óheppnir að klára ekki 3-4 færi sem þeir fengu. En það var á hinn veginn á síðustu bókmenntahátíð þegar þeir unnu 2-1, við áttum að klára nokkuð mörg góð færi þá, en gerðum það ekki,“ sagði Börkur.

 Fyrirliði útgefenda, Anna Lea, tók í sama streng og sagði að útgefendur hefðu legið í færum. „Það var al­gjör skandall að við skyld­um ekki hafa náð að saxa á þetta,“ sagði hún í sam­tali við mbl.

 Taldi Börkur að um tímamótasigur væri að ræða: aðeins annar sigur rithöfunda á kvölurum sínum á tuttugu árum.