Leigu­bíl­stjóri og vinur hans dæmdir fyrir nauðgun

Dómurinn var kveðinn upp í Héraðsdómi Reykjaness í síðustu viku en hefur ekki verið birtur. Málið kom upp í febrúar 2024. Þá sótti Mohamed Ali Chagra, 33 ára karlmaður, sem þá starfaði sem leigubílstjóri hjá City Taxi leigubílastöðinni, konuna á veitingastað í Hafnarfirði og ók með hana til hins mannsins, Amir Ben Abdallah, 28 ára  í húsnæði í Kópavogi.

Mennirnir voru ákærðir fyrir nauðgun, með því að hafa aðfaranótt laugardagsins 3. febrúar, haft samræði við konuna án hennar samþykkis. Þeir hafi beitt hana ólögmætri nauðung með því að notfæra sér ölvunarástand hennar. Höfðu þeir samræði við konuna hvor í sínu lagi en hún gat ekki spornað við verknaðinum vegna ölvunar og svefndrunga.

Sviptur leyfi fljótlega eftir að málið kom upp

Málið var til umfjöllunar í fjölmiðlum í febrúar í fyrra skömmu eftir að brotin áttu sér stað. Þá var vakin athygli á því í Facebook-hópi leigubílstjóra að Ali Chagra væri enn að starfa sem leigubílstjóri hjá City Taxi þrátt fyrir að vera grunaður um nauðgun. Hann var handtekinn í leigubílaröðinni á Keflavíkurflugvelli tveimur dögum eftir brotið og Ben Abdallah um svipað leyti. Hvorugur var úrskurðaður í gæsluvarðhald.

Sigtryggur Arnar Magnússon, framkvæmdastjóri City Taxi, sagði í samtali við Vísi þann 17. febrúar 2024 að hann hefði ekki vitað að Ali Chagra væri starfsmaður hjá sér. Hann hefði kosið að lögregla hefði gert stöðinni viðvart þegar honum var sleppt lausum. Sigtryggur segir Ali Chagra hafa falið það að hann ynni hjá City Taxi með því að skrá falsaða leigubílastöð á posann sinn. 

Sigtryggur hefði um leið og hann frétti af málinu slitið starfssamning við manninn og tilkynnt Samgöngustofu að maðurinn væri ekki lengur hjá stöðinni.

Annar leigubílstjóri sviptur

Þórhildur Elín Elínardóttir, upplýsingafulltrúi hjá Samgöngustofu, segir að leyfi leigubílstjórans hafi verið fellt niður í febrúar í fyrra eftir að upplýsingar bárust frá lögreglu þess efnis að hann væri grunaður um kynferðisbrot. Í lögum um leigubifreiðaakstur segir að Samgöngustofa hafi heimild til að svipta leigubílstjóra leyfi séu ríkar ástæður fyrir hendi og töf á sviptingu geti haft almannahættu í för með sér.

„Svo sem ef leyfishafi hefur sannanlega gerst sekur um vítavert hátterni og telja verður varhugavert að hann njóti leyfis áfram, er Samgöngustofu heimilt að svipta leyfishafa leyfi þegar í stað til bráðabirgða þar til endanleg ákvörðun í málinu hefur verið tekin,“ segir í lögunum.

Þórhildur staðfestir að lögregla hafi einnig sent upplýsingar um annan karlmann með leyfi til leigubílaaskturs sem hafi haft stöðu sakbornings í kynferðisbrotamáli. Sá hafi einnig verið sviptur leyfi með vísun til sömu laga. 

Fram kom í frétt RÚV um málið í febrúar 2024 að mennirnir hefðu verið búsettir hér á landi í um tvö ár eftir að hafa fengið alþjóðlega vernd hér á landi. 

Frumvarp Þorbjargar Sigríðar Gunnlaugsdóttur dómsmálaráðherra um breytingar á útlendingalögum hefur verið afgreitt úr ríkisstjórn og mælti ráðherrann fyrir frumvarpinu á Alþingi fyrr í apríl. Nái frumvarpið fram að ganga verður hægt að afturkalla alþjóðlega vernd þeirra sem fremja alvarleg afbrot hér á landi. Það mun þó aðeins eiga við um þá sem fremja brot eftir að lögin taka gildi og taka því ekki til þeirra sem eru til umfjöllunar að ofan.