Nauðgunardómur Guð­mundar Elíss stað­festur

Landsréttur kvað upp dóm þess efnis klukkan 15 í dag og staðfesti með honum dóm Héraðsdóms Reykjavíkur, sem kveðinn var upp í byrjun júlí í fyrra. Dómur Landsréttar hefur ekki verið birtur.

Ekki fyrsta brot Guðmundar Elíss

Greint var frá þeirri nauðgun, sem Guðmundur er dæmdur fyrir nú, þann 3. september árið 2021. Þá var Guðmundur á skilorði vegna dóms sem hann hlaut fyrir líkamsárás gegn þáverandi kærustu.

Í dómsmálinu var dæmt í tveimur sakamálum sem voru sam­einuð en hann var einnig ákærður fyr­ir brot í nánu sam­bandi fyr­ir að hafa veist að þáver­andi kærustu, Kamillu Ívarsdóttur, í Hafnar­f­irði árið 2020. Guðmund­ur var sýknaður af þeirri ákæru en niðurstaða um sýknu var meðal annars reist á því að áverkar hennar voru ekki taldir passa við lýsingu hennar á atvikum. Þá var auk þess langt liðið frá því að meint brot áttu sér stað og skýrslutaka fór fram.

Hittust á bar í Vestmannaeyjum

Í dómi Héraðsdóms sagði að tilkynning hefði borist lögreglu um nauðgun og líkamsárás aðfararanótt 2. september 2021. Brotaþoli hefði mætt á lögreglustöð ásamt vitni og móður en Guðmundur hafi verið handtekinn klukkutíma síðar á bryggju á Vestmannaeyjahöfn þar sem hann og annar skipverji biðu þess að verða sóttir.

Brotaþoli hafi sagst hafa hitt Guðmund ásamt hinum skipverjanum á bar með vinkonu og farið heim til hennar eftir lokun staðarins. Þau hefðu setið saman í sófa að kyssast og ákveðið að fara saman niður í svefnherbergi til að hafa samfarir. Brotaþoli hafi sagt Guðmund Elís hafa borðið „fullgrófur“ og hún beðið hann að róa sig en hann slegið hana með flötum lófa fjórum til fimm sinnum utan undir og sagt henni að hún væri hans.

Hún hafi sagst hafa beðið Guðmund Elís að hætta samförunum og ofbeldinu og hefði hann þá tekið hana hálstaki með hægri hendi svo hún komst ekki burt frá honum. Þá hefði hann ekki leyft henni að fara á klósettið og hún loks síðan hlaupið nakin upp stigann og inn í herbergi vinkonunnar sem hefði komið þangað inn og klætt hana í föt. Þær hefðu í kjölfarið hringt í móður vinkonunnar sem hafi skutlað þeim á lögreglustöð.

Óskilorðsbundið

Í niðurstöðu héraðsdóms kom fram að framburður konunnar hefði fengið stoð í þeim gögnum sem lögð höfðu verið fram við meðferð máls. Hún hefði strax leitað til lögreglu sem og að framburður hennar hefði verið stöðugur í gegnum alla meðferð málsins. Þá hefði ekkert fram komið sem benti til þess að brotaþoli hefði vitað hver Guðmundur Elís hefði verið þegar meint brot átti sér stað og þekkt forsögu hans heldur einungis þekkt hann undir millinafni. Með vísan til framangreinds hafi verið talið sannað að Guðmundur Elís hefði sýnt af sér þá háttsemi gagnvart brotaþola sem lýst var í ákæru.

Guðmundur var því dæmdur í óskilorðsbundið fangelsi til þriggja ára og gert að greiða henni tvær milljónir króna í miskabætur.