Ármannskonur upp í efstu deild í fyrsta sinn í 65 ár

Ármann fékk unglingalið Stjörnunnar í heimsókn í Laugardalshöllina og vann 45 stiga sigur, 102-57.

Ármannskonur hafa unnið alla sextán deildarleiki sína á leiktíðinni og eru búnar að vinna deildina þótt að aðalkeppinautar þeirra í KR eiga þrjá leiki eftir. Ármann er með sex stiga forskot þegar sex stig eru í pottinum en Ármann verður alltaf ofar ef Ármann og KR enda jöfn vegna betri árangurs í innbyrðis leikjum liðanna.

Efsta liðið fer beint upp en hitt sætið vinnst í úrslitakeppni þar sem taka þátt þrjú lið úr 1. deild og næst neðsta liðið úr Bónus deildinni. KR-konur eiga því enn möguleika á því að fylgja Ármanni upp í Bestu deildina.

Sigur Ármanns á unglingaliði Stjörnunnar í kvöld var öruggur.

Fyrirliðinn Jónína Þórdís Karlsdóttir fór fyrir Ármannsliðinu með 24 stigum, 9 fráköstum og 11 stoðsendingum. Hún var komin með tuttugu stig eftir aðeins fimmtán mínútna leik eftir að hafa sett niður sex af átta þriggja stiga skotum sínum.

Alarie Mayze skoraði 19 stig, Birgit Ósk Snorradóttir skoraði 18 stig og Carlotta Ellenrieder var með 10 stig og 10 fráköst.

Armann hefur ekki leikið í efstu deild kvenna síðan tímabilið 1959-60. Ámannskonur hafa spilað í 1. deildinni undanfarin fimm ár eða síðan að kvennaliðið var endurvakið.