Kórfélagarnir sorg­mæddir og „enginn hafði trú á því að þetta færi svona“

Bæjarblaðið Mosfellingur greindi frá því í morgun að organisti Lágafellskirkju hefði tilkynnt kórfélögum í Kirkjukór Lágafellssóknar á kóræfingu þann 11. febrúar að kórinn skyldi hætta þar sem hann væri orðinn gamall og lélegur.

„Ég er alveg í öngum mínum yfir þessu öllu og líður illa yfir því að þetta skyldi fara svona,“ segir Valgerður Magnúsdóttir, formaður Kirkjukórs Lágafellssóknar.

Organistinn fínasti drengur en ekki tæklað kórinn rétt

Þó fundurinn hafi átt sér stað í byrjun febrúar segir Valgerður aðdragandann vera mun lengri og nái aftur til ráðningar organistans, Árna Heiðars Karlssonar.

„Það var ráðinn nýr organisti 2023 og fljótlega fórum við að finna fyrir samstarfsörðugleikum við hann. Þetta er fínasti drengur, ég er ekki að álasa honum fyrir eitt eða neitt, en hann bara náði ekki að tækla þennan gamla kór,“ segir Valgerður.

Valgerður viðurkennir að kórinn sé orðinn býsna fullorðinn. Þrátt fyrir það séu ungar raddir inn á milli hinna öldruðu og kórinn geti alveg sungið fyrir því.

„Við erum búin að syngja þarna mörg í mörg ár. En svo allt í einu núna treysti hann okkur ekki. Þá byrjar svona ólga og leiðindi sem enduðu svona, því miður,“ segir hún.

Sjötíu ára söngafmæli í hættu

Lítil endurnýjun og nýliðun hefur verið í kórnum undanfarin ár og segir Valgerður bæði kórfélaga og organista bera þar ábyrgð. 

„Okkur hefur gengið illa að fá karla inn í kórinn þannig við höfum verið að berjast við að hafa einn til tvo tenóra. Og okkur hefur alls ekki gengið að fá nýtt fólk inn í kórinn,“ segir Valgerður.

Kórinn var stofnaður árið 1948, hefur starfað samfellt síðan og hafa margir meðlimir sungið með kórnum í áratugi. Valgerður er búin að vera í kórnum í 39 ár og einn félagi hennar hefði haldið upp á stórafmæli í haust.

„Við erum með einn sem hefði haldið upp á 70 ára kórafmæli næsta haust. Hann var bara drengur þegar hann byrjaði í kórnum og hefur gert allt mögulegt í kirkjunni, hann hefur verið kirkjuvörður, grafartökumaður og í öllu mögulegu,“ segir Valgerður.

„Hann er bassi og hann getur alveg sungið þó hann sé orðinn fullorðinn,“ segir hún.  Haldist staðan óbreytt muni hann þó ekki geta haldið upp á sjötíu ára söngafmælið í haust.

„Þá stóðu allir upp og fóru“

Organistinn hafði fundað með öðrum fulltrúum kirkjunnar morguninn áður en hann tilkynnti kórnum að best væri að hann myndi starfa fram á vor og hætta svo. Kórfélagar hafi spurt hann hvers vegna þeir ættu að hætta í vor.

 „Umræður fóru þá af stað sem enduðu þannig að hann óskaði eftir því að við hættum bara núna. Og þar með tókum við því sem brottrekstri,“ segir hún. „Þá stóðu allir upp og fóru.“ 

Síðan þá hafi kórinn ekki komið saman.

„Ég er mjög leið yfir þessu öll og finnst ömurlegt að þetta skuli hafa endað svona. Eins og ég hef sagt er Árni alls ekki slæmur maður, ég er ekki að alla á hann en hann bara náði ekki tökum á kórnum,“ segir hún.

Allir farið sáttir frá borði af fundi

Ekki er þó öll von úti því það hafa verið haldnir fundir með kórnum af hálfu safnaðarstjórnar kirkjunnar.

„Við erum að reyna að leysa þetta sem ég vona að takist því það finnst öllum innan kórsins þetta sorglegt og enginn hafði trú á því að þetta færi svona,“ segir Valgerður.

Mosfellingur hefur eftir sóknarnefnd kirkjunnar að sáttafundur milli hlutaðeigandi aðila hafi verið árangursríkur og tekur Valgerður undir það.

„Ég var mjög ánægð með þann fund og allir sem voru á fundinum voru það. Svo vinna þau úr því, sáttasemjararnir,“ segir hún.

Allir hafi farið sáttar frá þeim fundi að sögn Valgerðar

„Það svíður öllum að þetta hafi farið svona. Því það hefði ekkert þurft að fara svona ef hlustað hefði verið fyrr á kórinn þegar kvartað var undan samskiptum,“ segir hún að lokum.

Ekki náðist í Árna Heiðar Karlsson, organista við Lágafellskirkju.