„Ég veit ekki hvort menn eru farnir að horfa of langt fram á við“

„Við vorum ólíkir sjálfum okkur og mér fannst svipað upp á teningunum á móti ÍR [í síðasta leik]. Ég veit ekki hvort menn eru farnir að horfa of langt fram á við eða við séum orðnir værukærir eftir að hafa unnið einhverja leiki, en við þurfum allavega að spila töluvert mikið betur ef við ætlum að gera eitthvað í vetur“ hélt hann svo áfram.

Haukar leiddu nánast allan leikinn og voru átta stigum yfir þegar fjórði leikhluti hófst, en Valsmönnum tókst að snúa leiknum við á síðustu stundu.

„Við erum bara heppnir að fara með sigurinn af hólmi og tökum hann. Hann telur náttúrulega eins mikið og aðrir en frammistaðan böggar mann“

Valur á framundan leiki gegn Grindavík og Tindastóli í lokaumferðum deildarinnar áður en úrslitakeppnin hefst. Ljóst er að mikið þarf að lagast ef meistararnir ætla að verja titilinn í vor.

„Ég held að það sé bara sitt lítið af hverju [sem þarf að lagast]. Ég trúi allavega ekki að þetta sé það sem við viljum standa fyrir þannig að ég á ekki von á öðru en að mínir menn muni kveikja á sér og mæta klárir á næstu æfingu“ sagði Finnur Freyr að lokum.