„Ekki sitja í störukeppni á meðan molnar undan unga fólkinu“

Á föstudag greindi stjórn Sambands íslenskra sveitarfélaga frá því að hún féllist ekki á innanhústillögu ríkissáttasemjara sem hljóðaði upp á 24,5% launahækkun á samningstímanum.

Síðar greindi Heiða Björg Hilmisdóttir borgarstjóri og formaður SÍS frá því að hún hefði stutt tillöguna og að til greina kæmi að Reykjavík gerði sérkjarasamning við kennara. Fréttastofa hefur ekki fengið skýr svör frá borgarstjóra í dag um hvort þetta standi til. Síðdegis sendu bæjarfulltrúar Samfylkingarinnar í Hafnarfirði frá sér yfirlýsingu um þeir styddu afstöðu formannsins.

Ríkissáttasemjari segir í samtali við fréttastofu að enginn formlegur fundur sé á dagskrá en í dag var samfélagsmiðlaherferð kennara áberandi þar sem þeir sögðust vilja söðla um.

Tómlegt í framhaldsskólunum fyrir norðan

Ótímabundin verkföll í fimm framhaldsskólum eru í fullum gangi og staðan er þung fyrir norðan. Karl Frímannsson skólameistari MA segir að það sé afar tómlegt í skólanum sem venjulega iði af lífi.

„Okkar nemendur eru flestir frá Akureyri og Eyjafjarðarsvæðinu en þau sem búa ekki á Akureyri eru væntanlega langflest farin heim þannig að það fækkar nú alveg um 150-200 manns í bænum bara við verkfallið.“

Nýjar leikreglur ef borgin gerir sérkjarasamning

Hann óttast að verkfallið muni dragast á langinn.

„Eins og staðan er orðin núna þá lýst mér ekki vel á blikuna og ég met stöðuna þannig að deilan sé komin í mjög harðan hnút. Þegar þetta er komið á þann stað að stærsta sveitarfélag landsins hótar því að semja sérstaklega þá eru komnar nýjar leikreglur,“ segir Karl.

Vilja meiri upplýsingar um gang mála

Bæði Karl og Sigríður Huld Jónsdóttir skólameistari VMA eru ósátt við að fá ekki upplýsingar um stöðu mála af hálfu samninganefndar ríkisins.

„Samninganefnd ríkisins er bara aldrei í umræðunni. Þau gefa ekki einu sinni upp afstöðu sinna til þeirra tillagna sem liggja fyrir,“ segir Karl og Sigríður tekur í sama streng.

„Mér finnst þögnin frá samninganefnd ríkisins hafa verið nánast algjör í öllu þessu ferli. Það hefur heyrst miklu meira frá samninganefnd sveitarfélaganna heldur en samninganefnd ríkisins. Við erum ekki mikið upplýst um hvað er í gangi.“

Verkföllin bitni þyngst á nemendum sem búi við misgóðar aðstæður.

„Skóli er fyrir suma nemendur ákveðið öryggi og ákveðið athvarf. Þegar þessi griðastaður er dottinn út þá hefur það áhrif á þá einstaklinga sem hafa mestan stuðning í sínu lífinu í gegnum skólann sinn,“ segir Sigríður og Karl lýsir áhyggjum af sínum nemendum.

„Við langvarandi verkföll í framhaldsskólum eykst hættan á brottfalli. Tölurnar segja okkur það. Sum eru með sterkt bakland og önnur ekki og mörg þeirra hafa góð og öflug áhugamál á meðan önnur hafa þau ekki,“ segir Karl.

Þeim gremst að ekki sé fundað.

„Miðað við hnútukastið á föstudaginn og um helgina að þá hef ég bara áhyggjur af því að fólk setjist ekki einu sinni niður,“ segir Karl.

Sigríður vildi að lokum fá að koma skilaboðum til samninganefndanna.

„Fariði að klára þetta. Það eru mín skilaboð út í kosmósið til þeirra sem vinna að þessum málum. Ekki sitja bara i störukeppni á meðan molnar undan unga fólkinu okkar.“