Á­rásar­maðurinn hafi átt í sam­skiptum við lykilvitni

Bryndís Klara var stungin á Menningarnótt og lést af sárum sínum dögum seinna. Hún var í bifreið með fjórum öðrum börnum þegar árásarmaðurinn, fyrrverandi kærasti eins farþegans, kemur að bílnum og segist vilja ræða við hana.

Árásarmaðurinn hafi fylgst með fyrrverandi kærustunni í gegnum staðsetningarforritið Live360. Hún hafi ekki viljað ræða málin og brást hann við með því að brjóta hliðarrúðu.

Bryndís Klara og vinkona hennar flúðu bílinn en Bryndís Klara snéri við til að hjálpa stúlkunni. Hún hafi verið að tosa árásarmanninn út úr bílnum þegar hann snýr sér við og stingur hana í hjartað.

Auk Bryndísar Klöru stakk árásarmaðurinn, sem var þá sextán ára, tvo aðra farþega í bílnum.

Árásarmaðurinn var handtekinn á heimili sínu stuttu eftir árásina. Þegar hann kom heim hafði hann sagt forráðamönnunum sínum af árásinni en þau sendu hann í sturtu, þrifu fötin sem hann var í og földu hnífinn.

Rætt var við foreldra Bryndísar Klöru í Kompás.

Í kvöldfréttum Rúv í kvöld kom fram að árásarmaðurinn hafi verið í sambandi við einn brotaþola, fyrrverandi kærustu sína, á meðan hann er í gæsluvarðhaldi. Þá hafi hann einnig verið virkur á samfélagsmiðlum.

Þá liggur ekki fyrir hvernig árásarmaðurinn hefur verið í samskiptum við brotaþolann.

Árásarmaðurinn er vistaður í úrræði Barnaverndar en njóta öll börn þar sömu meðferðar samkvæmt reglugerð um afplánun sakhæfra barna. Börnin geta þá fengið fólk í heimsókn og aðgang að leikjatölvum sem geta verið nettengdar.