Smith var skipaður af Garland og hefur séð um að rannsaka Trump vegna tveggja mála. Annars vegar hefur hann haft aðkomu Trumps að árásinni að þinghúsi Bandaríkjanna þann 6. janúar 2021 til rannsóknar en þá reyndu stuðningsmenn Trumps að koma í veg fyrir formlega staðfestingu úrslita forsetakosninganna 2020.
Sjá einnig: Byrjuðu strax að endurskrifa sögu árásarinnar
Þá hefur hann einnig rannsakað Trump vegna leynilegra skjala sem hann tók með sér þegar hann flutti úr Hvíta húsinu til Flórída í janúar 2021. Lögum samkvæmt hefði hann átt að afhenda Þjóðskjalasafni Bandaríkjanna skjölin.
Reglur ráðuneytisins segja til um að sérstakir rannsakendur verði að skrifa skýrslur um rannsóknir sínar þar sem þeir fara yfir helstu vendingar í málum sem þeir hafa til rannsóknar og útskýri ákvarðanir sínar.
Skýrslan í skjalamálinu er sögð í undirbúningi og lögmenn Trumps halda því fram að hún verði líklega birt á næstu dögum. Óljóst er hvort til standi að skrifa skýrslu í hinu málinu um árásina á þinghúsið.
Smith ákærði Trump í því máli á grunni njósnalaga Bandaríkjanna en málið var látið falla niður af Aileen Cannon, dómara sem Trump skipaði í embætti á fyrsta kjörtímabili sínu og hefur verið harðlega gagnrýndur fyrir umdeildar ákvarðanir sem hafa þótt Trump í vil.
Hún vísaði málinu þó frá og á þeim umdeilda grunni að Smith hefði ekki verið skipaður í embætti samkvæmt lögum, þrátt fyrir fjölmörg fordæmi áratugi aftur í tímann.
Sjá einnig: Vísaði skjalamálinu frá og á lista yfir mögulega dómsmálaráðherra
Sigur Trumps í forsetakosningunum markaði svo í raun endalok á málaferlunum gegn honum, bæði vegna starfsreglna dómsmálaráðuneytisins um að ekki megi sækja sitjandi forseta til saka og sökum þess að hann getur bundið enda á rannsóknirnar sem forseti og skipað dómsmálaráðherra sem gengið getur úr skugga um að málaferlunum sé hætt.
Skýrsla Smiths verður því að lokum endalokin á störfum hans og teymis hans.
Trump hefur sagt að hann muni reka Smith á fyrsta degi hans í embætti en saksóknarinn og teymi hans hafa unnið að því að klára skýrslur sínar áður en Trump tekur embætti og er Smith sagður ætla að hætta störfum áður en Trump getur rekið hann.
Ólíklegt að kröfurnar beri árangur
Lögmenn Trumps hafa sent bréf til Garlands þar sem þeir krefjast þess að hann birti ekki skýrslu Smiths í skjalamálinu og þá hafa lögmenn á vegum tveggja manna sem voru einnig ákærðir í málinu sendu kröfu til Cannon og biðja þeir hana einnig um að stöðva birtingu skýrslunnar. Trump er ekki lengur aðili að því máli eftir að hann vann forstakosningarnar í nóvember.
Í bréfinu til Garlands segjast lögmenn Trumps þeir hafa séð drög að skýrslunni í skjalamálinu svokallaða og lýsa henni sem pólitískri árás á Trump, samkvæmt frétt New York Times. Þá saka þeir Smith um að starfa ólöglega og segja að birting skýrslu sem byggir á rannsókn hans fari gegn stjórnarskrá og að slíkt þjónaði eingöngu þeim tilgangi að koma höggi á Trump.
Þeir segja einnig að í drögunum sem þeir hafi séð sé því haldið fram að Trump hafi brotið nokkur lög í skjalamálinu.
Í grein NYT segir að báðar kröfurnar séu ólíklegar til að bera árangur. Lögmenn Trumps hafi ekkert vald til að stöðva Garland í að birta skýrsluna í skjalamálinu. Þá er einnig ólíklegt að Cannon hafi yfir höfuð vald til að þvinga dómsmálaráðherra til að birta ekki skýrslu sérstaks rannsakenda sem hann skipaði og þá sérstaklega þegar málið er ekki lengur á hennar borði.
Sjá einnig: Áfrýjar ákvörðun dómara um að vísa leyniskjalamáli Trump frá
Hins vegar geti reynst erfitt að birta skýrsluna áður en Trump tekur embætti þar sem sérfræðingar leyniþjónusta Bandaríkjanna þurfa að fara kyrfilega yfir hana og ganga úr skugga um að engar leynilegar upplýsingar komi þar fram.
Báðir lögmennirnir sem sendu bréfið til Garlands, þeir Todd Blanche og Emil Bove, hafa verið skipaðir í háttsett embætti í dómsmálaráðuneyti Trumps og gætu komið að því á kjörtímabilinu að rannsaka rannsóknirnar gegn Trump, sem hefur heitið hefndum.
