Hjálpar­gögnum stolið af tæp­lega hundrað flutningabifreiðum

Samkvæmt BBC hafa vitni lýst því að árásarmennirnir hafi verið grímuklæddir og vopnaðir skotvopnum og handsprengjum.

Philippe Lazzarini, framkvæmdastjóri Palestínuflóttamannaaðstoðar Sameinuðu þjóðanna (UNRWA), tjáði sig ekki um það í gær hverjir hefðu staðið að verki en sagði algjört hrun lög og reglu á svæðinu hafa gert það ómögulegt að athafna sig þar.

Um það bil tvær milljónir íbúa Gasa reiða sig á neyðaraðstoð og UNRWA segir vondar aðstæður munu versna enn frekar ef meiri aðstoð berst ekki á svæðið á næstu dögum og vikum. Varað hefur við hungursneyð á norðurhluta Gasa.

Lazzarini segir aðstæður núna þannig að bílalestir fái enga fylgd og að gengi og fjölskyldur berjist um að nýta sér öll aðföng á suðurhluta svæðisins. Aðstæður séu orðnar ómögulegar. Þá hafi hundruð manna reynt að ráðast inn í miðstöð UNRWA í Khan Younis til að freista þess að komast yfir matvæli.

Ísraelsher stendur enn í stóraðgerðum á Gasa og tugir hafa verið drepnir á síðustu dögum. UNRWA sakar stjórnvöld í Ísrael um áframhaldandi andvaraleysi gagnvart ástandinu á svæðinu og neyð íbúa.