Greina matinn sem börnin á Mánagarði borðuðu

Mikið álag er á barnaspítalanum vegna E.coli-sýkingar meðal leikskólabarna samkvæmt upplýsingum fréttastofu. Sex börn voru inniliggjandi þegar mest var fyrir hádegi en voru fjögur nú í hádeginu. Nokkur börn eru minna veik og eru í eftirliti hjá barnadeild Landspítalans.

Að minnsta kosti tíu börn eru með einkenni að sögn Guðrúnar Aspelund, sóttvarnalæknis og e.coli smit hefur verið staðfest hjá þremur þeirra. Börnin eru á leikskólanum Mánagarði sem er rekinn af Félagsstofnun stúdenta við Eggertsgötu í Vesturbæ Reykjavíkur. Um 120 börn eru á leikskólanum.

Sóttvarnalæknir fundaði með stýrihópi vegna málsins fyrir hádegi. Sigríður Dóra Magnúsdóttir framkvæmdastjóri Heilsugæslunnar á höfuðborgarsvæðinu er meðal þeirra sem sat fundinn. Hún segir stekran grun um ákveðna bakteríu sem sé væntanlega matarborin. Ekki liggi fyrir hvaðan hún kom.

„Það er verið að taka sýni úr matvælum,“ segir Sigríður Dóra. Um sé að ræða sama mat og borðaður hefur verið á leikskólanum nema óeldaður. Sérfræðingar Matvælastofnunar og heilbrigðiseftirlitsins standi í greiningum.

Guðrún Aspelund sóttvarnalæknir tjáði fréttastofu í morgun að um væri að ræða bakteríu sem geti valdið alvarlegri meltingarsýkingu og verið sérstaklega hættuleg börnum.

„Oft gengur þetta yfir að sjálfu sér. Það á ekki að nota nein sýklalyf gegn þessu. Þetta er matartengd sýking yfirleitt. Þetta er svokölluð súna, þannig að þessi baktería kemur upprunalega frá dýrum. Getur komið beint frá dýrum en oftast er þetta matartengt. Þetta getur líka verið í vatni, en er helst í nautakjöti, salati. Þetta er því spurning um hreinlæti og meðhöndlun matar,“ segir Guðrún Aspelund.

Meðgöngutími sýkingar er tveir til fjórir dagar. Sýkingin getur verið væg og lítil einkenni en líka gengið hratt með miklum einkennum á skömmum tíma.

„Börn sem eru lasin með mikil einkenni, blóðugur niðurgangur, uppköst, hiti, slappleiki, á að vísa á Barnaspítala Hringsins. Börn með nýtilkominn niðurgang eða önnur einkenni sem vekja grun um smit, ráðlagt að senda hægðasýni í ræktun og fylgjast með börnunum. Sama á við um fullorðna einstklinga sem tengjast leikskólanum á einn eða annan hátt,“ segir í tilmælum Heilsugæslunnar á höfuðborgarsvæðinu til starfsfólks.

Hugur starfsfólks hjá börnunum

Soffía Emelía Bragadóttir, leikskólastjóri Mánaagarðs hefur sent frá sér yfirlýsingu vegna E.coli sýkingar í leikskólanum. Hún segir málið litið alvarlegum augum og að hugur sinn sé hjá börnunum á leikskólanum og foreldrum þeirra.

Hún segir að foreldrar og aðrir hagaðilar muni fá uppfærslur af gangi mála.

„Seinnipart þriðjudagsins 22. október greindist barn af leikskólanum Mánagarði með E.coli sýkingu. Í kjölfarið hafa þrjú önnur börn greinst með sýkinguna. Í samráði við sóttvarnayfirvöld var tekin ákvörðun um að loka leikskólanum tímabundið og unnið er nú að rannsókn málsins og sótthreinsun húsnæðisins,“ segir í tilkynningu Soffíu.

Hún minnist á að sóttvarnalæknir hafi sett á sérstakan stýrihóp sem muni til að mynda rekja uppruna sýkingarinnar. Þá verði hagaðilar upplýstir um möguleg einkenni ásamt upplýsingum um hvernig skuli bregðast við ef grunur er um smit.

Ferlar teknir til skoðunar

„Voru allir foreldrar upplýstir um málið í gærkvöldi og hlutu þau einnig leiðbeiningar frá Sóttvarnalækni. Eru foreldrar hvattir til að kynna sér vel leiðbeiningar Sóttvarnalæknis um e.coli sýkingar og fylgjast vel með líðan barna sinna.“

Soffía segir að enn sé beðið eftir upplýsingum frá talsmanni stýrihóps Sóttvarnalæknis en FS hafi nú þegar hafið yfirferð og endurskoðun á öllum ferlum innan leikskólans sem snúa að hreinlæti, matvælum og meðferð þeirra.

„Málið er litið mjög alvarlegum augum. Hugur okkar er fyrst og fremst hjá börnum Mánagarðs og foreldrum þeirra. Við munum veita foreldrum og öðrum hagaðilum reglulegar uppfærslur um gang mála og í samstarfi við Sóttvarnarlækni, Heilbrigðiseftirlitið og aðra viðeigandi aðila.“