Óttast aukna út­breiðslu sýklalyfjaónæmra lekandabaktería

Samkvæmt umfjöllun Guardian greindust fimmtán með stofna lekanda sem reyndust ónæmir fyrir sýklalyfinu ceftriaxone á tímabilinu júní 2022 til maí 2024. Ceftriaxone er fyrsta val þegar einstaklingur greinist með lekanda.

Nokkrir þessara fimmtán þurftu að leggjast inn á sjúkrahús og fá blöndu af sýklalyfjum til að koma í veg fyrir útbreiðslu sýkingarinnar og alvarlegar afleiðingar, sem geta meðal annars verið bólgur í kviði og ófrjósemi.

Fimm greindust með ofur-ónæma stofna lekanda, sem þýðir að bakteríurnar reyndust ónæmar fyrir fjölda sýklalyfja.

Fyrir árið 2022 höfðu aðeins níu tilvik af sýklalyfjaónæmum lekanda greinst á Englandi.

Samkvæmt UK Health Security Agency (UKHSA) eru flestir þeirra sem hafa greinst gagnkynhneigðir og á þrítugsaldri. Þá eru flestir taldir hafa smitast utanlands en vitað er um smit innanlands.

Um það bil 85 þúsund manns greindust með lekanda á Englandi í fyrra, þannig að um er að ræða afar lítinn fjölda. Kynsjúkdómasmitum fer hins vegar fjölgandi og sérfræðingar hafa áhyggjur af því að aukin útbreiðsla gæti leitt til aukins sýklalyfjaónæmis.

Í versta falli gæti farið svo að ekki verði hægt að meðhöndla lekanda og því er fólk hvatt til að nota smokkinn og láta athuga sig ef grunur leikur á smiti.

Hér má finna ítarlega umfjöllun Guardian.