Loksins Evrópumark hjá Patrick Peder­sen

Pedersen skoraði í gær sitt fyrsta Evrópumark fyrir Val þegar Valsmenn tryggðu sér sæti í annarri umferð í forkeppni Sambandsdeildarinnar. Það gerðu þeir með sannfærandi 4-0 útisigri á albanska félaginu Vllaznia.

Pedersen varð á dögunum markahæsti leikmaður Vals í efstu deild þegar hann skoraði sitt 110. mark í aðeins leik númer 176 og bætti þar með markamet Inga Björns Albertssonar.

Pedersen hafði aftur á móti ekki tekist að skora fyrir Val í Evrópuleikjum. Fyrir leikinn í gær var hann búinn að spila fjórtán Evrópuleiki fyrir Val án þess að skora.

1114 mínútur án þess að skora

Markið hans kom á 36. mínútu í gær. Þá var Pedersen búinn að vera inn á vellinum í 1114 mínútur í Evrópukeppnum án þess að skora.

Þetta voru sex leikir án þess að skora í forkeppni Meistaradeildarinnar, fimm leikir án þess að skora í forkeppni Evrópudeildarinnar og þrír leikir án þess að skora í forkeppni Sambandsdeildarinnar.

Hemmi Gunn á metið

Markið datt loksins inn í gær. Nú er bara að vona að Pedersen sé búinn að finna markaskóna í Evrópu og geti hjálpað Valsliðinu að komast enn lengra.

Hvort honum takist að slá markamet Vals í Evrópu er önnur saga en það er í eigu Hermanns Gunnarssonar sem skoraði á sínum tíma fjögur Evrópumörk fyrir félagið.