„Við höfum ekkert“

Þetta er í fyrsta sinn sem Ísraelar gera áhlaup með þessum hætti á Rafah en það var gert í kjölfar þess að minnsta kosti 45 féllu í loftárásum Ísraela á aðrar tjaldbúðir í borginni og um tvö hundruð særðust.

Myndefni af vettvangi eldhafsins hefur meðal annars sýnt illa brunnin lík og mann halda á líki höfuðlauss barns. Árásirnar eiga að hafa beinst gegn tveimur leiðtogum Hamas-samtakanna, sem Ísraelar segja að hafi fallið í þeim.

Sjá einnig: Hryllingur í Rafah eftir hefndaraðgerðir

Forsvarsmenn ísraelska hersins höfðu í gær haldið því fram að mögulega hefðu Hamas-liðar kveikt eldinn. Hljóðið hefur þó breyst í dag þar sem Ísraelar eru sagðir hafa tilkynnt Bandaríkjamönnum að brot úr sprengjunum sem varpað var á búðirnar hafi lent í nærliggjandi eldsneytistanki og eldurinn hafi kviknað þannig.

Daniel Hagari, talsmaður hersins, sagði í dag að einnig væri mögulegt að sprengjur sem hefðu getað verið í geymslu nærri skotmarkinu hafi sprungið í loftárásunum. Þær sprengjur sem notaðar voru væru ekki nægilega öflugar, samkvæmt frétt CNN.

Enn væri þó ekki hægt að segja til um upptök eldsins með vissu.

Benjamín Netanjahú, forsætisráðherra Ísrael, lýsti dauða fólksins sem hræðilegum mistökum í gær en atvikið og árásir Ísraelsmanna hafa verið harðlega gagnrýndar á heimssviðinu.

Koma neyðarbirgðum ekki til Rafah

Áætlað er að meira en milljón manns, eða tæplega helmingur íbúa Gasastrandarinnar, hafi flúið til Rafah á undanförnum mánuðum, vegna hernaðar Ísraela. Hundruð þúsunda þeirra hafa svo þurft að flýja aftur vegna árása á borgina á undanförnum vikum.

Þetta fólk hefur dreifst um stór svæði og heldur til í tjöldum, við slæmar aðstæður. Þessum svæðum hefur verið lýst sem mannúðarsvæðum en þar má finna mjög fá eldhús, markaði eða sjúkrahús, svo eitthvað sé nefnt.

Samkvæmt AP fréttaveitunni má finna umfangsmiklar tjaldbúðir á rúmlega sextán kílómetra löngum kafla syðst með strönd Gasastrandarinnar. Þar hafa fjölskyldur grafið skurði þar sem fólk getur gengið örna sinna og eru feður sagðir fara um í leit að mat og vatni á meðan börn grafa í gegnum rusl og rústir húsa til að finna brak sem hægt er að brenna og nota til að elda mat.

Þá hefur verulega dregið úr flæði neyðarbirgða til starfsmanna Sameinuðu þjóðanna á svæðinu. Ísraelar segja að 370 vörubílum hafi verið hleypt inn á svæðið í gær með matvæli, lyf og aðrar nauðsynjar en forsvarsmenn Palestínuflóttamannahjálpar Sameinuðu þjóðanna segja að einungis þrjátíu bílar hafi skilað sér á áfangastað í dag, vegna takmarkana á því hvar hægt sé að aka þeim og vegna átaka á svæðinu.

Flestar neyðarbirgðir berast inna á Gasaströndina í norðri, gegnum tvær landamærastöðvar og bryggju sem Bandaríkjamenn hafa reist. Henni var lokað í dag um tíma vegna veðurs.

Rafah er þó syðsta borga svæðisins en þar er búið að loka tveimur stærstu landamærastöðvum Gasa og hafa Sameinuðu þjóðirnar ekki aðgang að þeim.

„Ástandið er raunarlegt,“ sagði einn viðmælandi AP.

„Við erum með tuttugu manns í tjaldinu, ekkert hreint vatn, ekkert rafmagn. Við höfum ekkert.“

Hann sagði erfitt að útskýra tilfinningar sínar að svo stöddu. „Þetta er búið að gera út af við okkur andlega,“ sagði Mohammad Abu Radwan.

Hann flúði Rafah skömmu eftir fyrstu árásir Ísraela á borigina þann 6. maí en hann og fjölskylda hans héldu til í húsi í borginni. Það tók þau rúman dag að setja saman heimagert tjald og við hlið þess grófu þau skurð fyrir klósettaðstöðu.

Heilbrigðisráðuneyti Gasa, sem stýrt er af Hamas, segir 36 þúsund manns hafa fallið í árásum Ísraela á undanförnum átta mánuðum.

Ráðamenn í Ísrael hafa lýst Rafah sem einu af síðustu vígum Hamas og segjast þurfa að bjarga gíslum sem eiga að vera þar í haldi.Alþjóðadómstóllinn í Haag hefur skipað Ísraelum að láta af hernaði í Rafah.