Fólk sem ætlar að kjósa gegn Katrínu gæti lent í vand­ræðum

 Bryndís segir fylgið á hreyfingu og það sé margt sem bendi til þess að Höllurnar tvær séu að skipta um hlutverk að vera í öðru sæti.

„Halla Tómasar hefur gert þetta áður. Ég var að rýna í kannanir og í síðustu könnun, daginn fyrir kjördag síðast, var hún níu prósentustigum undir því sem hún fékk upp úr kjörkössunum. Það er ótrúlega áhugavert,“ segir Bryndís og að Guðni Th. Jóhannesson hafi fengið um fimm prósentustigum minna en hann fékk svo.

Bryndís segir það einnig vinna með Höllu Tómasar að fólk hafi kosið hana áður til forseta.

Þórhallur nefndi fyrst það sem hann vill kalla „tveggja prósenta fólkið“. Það eru Steinunn Ólína, Ásdís Rán, Viktor og Ástþór sem ferðast nú saman um landið „eins og uppistandshópur“.

„Ég reikna með þeim á Þjóðhátíð í Eyjum,“ segir Þórhallur og að það sé ákveðinn galdur í þessu.

Áður fyrr hafi þeim sem fái svona lítið fylgi verið hafnað og fólk fái „aulahroll“. Þessi hópur sé aftur á móti búinn að vinna sér inn mikla virðingu og eru vinsæl. Þar hafi Steinunn Ólína mikil áhrif. Hún sé fordæmalaus og gangi inn í aðstæður þar sem þarf að aðstoða þá sem hafa undir högg að sækja. Samstaða hópsins sé líklega henni að þakka.

Bryndís segir þetta samstarf smart og virðingarvert. Þau séu góð fyrirmynd.

Hvað varðar næstu vikuna segir Þórhallur að hún verði spennandi. Hann segist þegar byrjaður að raula nýtt kosningalag Jóns Gnarr og að hann sé sammála um Höllurnar tvær.

„Nú fara trompin að koma,“ segir Þórhallur og að hann efist um að Katrín eigi mörg slík inni. Hann upplifi að baráttan verði á milli Höllu Tómasar og Höllu Hrundar, það er hvorri þeirri tekst að komast nálægt Katrínu.

Miklar óvinsældir Katrínar

Viktor fór aðeins yfir vinsældir Katrínar, eða óvinsældir, og segir að þegar hún tilkynnti framboð sitt hafi hann skoðað vinsældarkannanir á ráðherrum. Könnunin hafi verið framkvæmd í desember og þar hafi hún verið með um 30 prósenta fylgi. Það geti spáð fyrir um það fylgi sem hún eigi inni í þessum kosningum.

„Hún hefur verið að mælast með það og minna. Hún er augljóslega með fastasta fylgið af þeim frambjóðendum sem koma til greina. Það hefur í raun og veru ekki komið mér á óvart að margir kjósendur líti á hana sem frambjóðanda ríkisstjórnarinnar að einhverju leyti. Ríkisstjórnin er umdeild og hefur sirka þetta mikið fylgi,“ segir Viktor og að þannig líti margir á hana. Það vinni með henni og gegn henni.

Framboð hennar hafi orðið táknrænt fyrir klofning innan ríkisstjórnarinnar. Það megi svo ræða það hvort hún beri ábyrgð á því sem persóna. Fylgið sé fast í kringum 25 til 30 prósent en svo sé annað fylgi á hreyfingu. Margir vilji alls ekki sjá hana og kjósi því þann sem eigi bestan sjéns á að vinna hana.

„Þetta fólk gæti lent í miklum vandræðum ef kannanir halda áfram að vera eins og þær eru,“ segir Viktor því mjög óljóst sé hver af öðrum frambjóðendum eigi sjéns á því.

Bryndís nefndi þá könnun Maskínu þar sem var spurt um hvernig kjósendum líst á frambjóðendur. Um 40 prósent hafi litist illa á Katrínu en það sem hún hafi samt í erminni er löng reynsla hennar af kosningabaráttu.

Bryndís fór því í gegnum kosningamyndböndin sem frambjóðendur hafa verið að birta og í lok hennar myndbands óski hún um stuðning. Það sé algert lykilatriði. Auk þess skipti miklu máli að haga baráttunni vel síðustu vikuna. Eins og að ná til kjósenda og að koma þeim á kjörstað. Þetta kunni Katrín vel og það muni vinna með henni.

Þórhallur tekur undir þetta og segir að ef Katrín sýni auðmýkt í þessari lokaviku og verði aftur „gamla, góða Katrín“ gæti vel verið að fólk sættist við hana og kjósi hana.

„En það eru mjög margir enn sárir.“

Óvenjulegt í kjöri til forseta

Bryndís segir óvenjulegt við baráttuna núna að það sé einn frambjóðandi, Katrín, sem fólk er á móti. Yfirleitt sé það þannig að fólk kannski höfði ekki til fólks en kjósendur séu ekki á móti þeim. Þar hjálpi ekki að Bjarni Benediktsson hafi tekið við forsætisráðherraembættinu á eftir henni, en ekki Sigurður Ingi Jóhannsson.

Þórhallur segir að ef Katrín vinni gæti hún þurft að byrja kjörtímabilið á átökum og gæti þurft að hafa fyrir því að vera sameiningartákn fyrir þjóðina. Aðrir frambjóðendur myndu ekki þurfa að hafa eins fyrir því og hún.

Viktor segir marga kjósendur óánægða með ríkisstjórnina og finnist óþægilegt að einstaklingur fari frá því hlutverki og beint í forsetastólinn.

Viktor segir þrjá frambjóðendur geta risið hærra í vikunni. Höllu Tómasdóttur, Höllu Hrund og Baldur. Kappræðurnar í lok vikunnar gætu skipt máli. Rannsóknir hafi sýnt að kjósendur séu í síauknum mæli að gera upp hug sinn stuttu áður en kosningar fara fram. Jafnvel á kjördag.

Þórhallur segir allt opið fyrir Höllurnar ef þær vinna þessa síðustu viku vel. Halla Tómasdóttir hafi höfðað til fólks í atvinnulífinu og Halla Hrund til „venjulegra Íslendinga“.

Gott að taka sjéns 

„Nú skiptir máli hvort þær komi með einhvern nýjan tón,“ segir Þórhallur. Halla Hrund gæti verið meira afgerandi í svörum sem dæmi.

Hann segir fjóra efstu hafa verið stressaða í kappræðum og við það verði þau passíf. „Mér finnst að allir eigi að taka sjénsa núna.“

Bryndís segir það vinna með Höllu Tómasardóttur að enn eigi eftir að fara fram fjórar kappræður. Aðrir frambjóðendur hafi ekki verið eins sterkir þar og hún.

Þá fóru þau aðeins yfir ólíka sýn frambjóðenda á hlutverk forseta. Þau muni í raun öll sinna því á ólíkan hátt.