Segir rangt að gjald­skylda á nagla­dekk sé í skoðun

„Ég vil taka skýrt fram að það er sannarlega ekki verið að skoða að taka upp gjaldskyldu á notkun nagladekkja í Reykjavík. Sjálfur tel ég mikilvægt að fækka nagladekkjum enda bætir það loftgæði. Það gerum við með fræðslu - og bættum snjómokstri og söltun.“ segir Einar í færslu á Facebook þar sem hann vísar í frétt Mbl.is.

Í umræddri frétt kemur fram að stýrihópur um loft­gæði í Reykja­vík sé með þessa hugmynd til skoðunar. Þetta hafi komið fram á málþingi um loft­meng­un á veg­um Reykja­vík­ur­borg­ar í gær.

Einar heldur því fram að frétt Mbl sé undarleg, en að málþingið hafi annars verið gott.

„í Reykjavík býr fólk sem kýs að nota nagladekk öryggisins vegna og yfirleitt vegna þess að það á oft erindi út fyrir borgarmörkin. Höfuðborgin er líka allra landsmanna og hingað kemur fólk sem býr við aðrar aðstæður en flestir íbúar borgarinnar,“ segir hann.

„Ég myndi styðja jákvæða opinbera hvata til þess að gera harðkornadekk eða aðrar slíkar tegundir hagkvæmari kost en nagladekk. En boð og bönn og auknar álögur hugnast mér ekki.“