Kreml for­dæmir um­mæli Macrons og Camerons

Peskóv sagði náið fylgst með ummælum ráðamanna í Evrópu um innrás Rússa í Úkraínu.

Macron sagði í viðtali við Economist sem birt var í gær að hann vildi ekki útiloka það að senda franska hermenn til Úkraínu, ef Rússar brytu sér leið í gegnum varnir Úkraínumanna. Hann hafði áður slegið á svipaða strengi en í viðtalinu sagði hann að Vladimír Pútín, forseti Rússlands, útilokaði sjálfur ekki neitt.

Hann sagði að ef Rússar ákvæðu að ganga lengra þyrftu ráðamenn í Evrópu að spyrja sig erfiðra spurninga, þar sem Rússland ógnaði öryggi Evrópu.

„Ég hef skýr markmið: Rússland má ekki vinna í Úkraínu.“

Hann bætti við að ef það gerðist yrði ekkert öryggi í heimsálfunni. Erfitt væri að ímynda sér að Rússar segðu staðar numið þar og spurði hvurslags öryggi íbúar Moldóvu, Rúmeníu, Póllands, Litháen og annarra nágranna Rússlands myndu þá búa við.

Mega nota bresk vopn til árása í Rússlandi

David Cameron, utanríkisráðherra Bretlands og fyrrverandi forsætisráðherra, sagði sömuleiðis í gær að Bretar væru ekki mótfallnir því að Úkraínumenn notuðu hergögn frá Bretlandi til að gera árásir á skotmörk í Rússlandi.

Það væri Úkraínumanna að ákveða hvað þeir gerðu við vopnin, samkvæmt því sem Cameron sagði í samtali við Reuters.

Aðrir bandamenn Úkraínu hafa margir hverjir meinað Úkraínumönnum að nota vopn frá þeim til slíkra árása. Má þar meðal annars nefna Bandaríkin og Þýskaland.

Peskóv segir að bæði ummælin séu „hættuleg“ og áhyggjuefni.

Versnandi staða í austri

Ráðamenn í Úkraínu hafa að undanförnu lýst erfiðum aðstæðum fyrir úkraínska hermenn í austurhluta landsins, þar sem Rússar njóta yfirburða í bæði mannafla og skotfærum. Vólódímír Selenskí, forseti Úkraínu, hefur beðið Cameron um að flýta hergagnasendingum Breta til Úkraínu, samkvæmt AP fréttaveitunni, og hefur Vadím Skibitskí, einn af yfirmönnum leyniþjónustu úkraínska hersins, einnig slegið á svipaða strengi.

Sjá einnig: Hafa engin varnarvirki til að hörfa í

Í viðtali við Economist sagði Skibitskí að Úkraínumenn eigi í erfiðleikum með að stöðva framsókn Rússa í austri.

„Vandi okkar er mjög einfaldur. Við eigum engin vopn. Við vissum alltaf að apríl og maí yrðu erfiðir mánuðir fyrir okkur.“

Rússar gera nú umfangsmikið áhlaup að hinum mikilvæga bæ Tjasív Jar, sem er vestur af Bakmút í Dónetskhéraði. Borgin er mikilvægur hlekkur í birgðakeðju Úkraínumanna og myndi opna leið fyrir Rússa dýpra inn í Úkraínu.

Skibitskí segir Rússa vilja tryggja yfirráð sín yfir öllum Lúhansk og Dónetskhéruðum. Hann segir einnig að Rússar vilji gera atlögu að Karkív og Súmí í norðausturhluta Úkraínu og áætla Úkraínumenn að rúmlega hálf milljón rússneskra hermanna taki nú þátt í innrásinni í Úkraínu.

Karkív hefur lengi verið skotmark Rússa en Úkraínumönnum hefur tekist að verja borgina frá því innrásin hófst í febrúar 2022. Borgin er þó skammt frá landamærum Rússlands og hefur verið undir linnulausum árásum undanfarna mánuði sem valdið hafa miklum skemmdum þar og mannfalli.

Skibitskí segist ekki sjá leið fyrir Úkraínumenn til að vinna stríðið gegn Rússum á vígvöllum Úkraínu. Jafnvel þó þeir myndu reka Rússa á brott, sem yrði gífurlega erfitt miðað við stöðuna í dag, myndi það ekki binda enda á átökin.

Hann segir að stríð sem þetta geti eingöngu endað með samningum og báðar fylkingar hafi nú í huga að ná betri samningsstöðu í aðdraganda mögulegra viðræðna. Skibitskí telur þó að slíkar viðræður geti ekki hafist fyrr en í fyrsta lagi á seinni hluta næsta árs. Telur hann líklegt að þá verði Rússar komnir í vandræði með hergagnaframleiðslu vegna aðfangaskorts. Hann segir þó að á breytist ekkert verði Úkraínumenn uppiskroppa með vopn á undan Rússum.