Geta unnið fjóra í röð í fyrsta sinn í heilan ára­tug

Njarðvíkingar voru 1-2 undir á móti Þór úr Þorlákshöfn í átta liða úrslitunum en tryggðu sig áfram með því að vinna tvo síðustu leikina. Þeir fylgdu því síðan eftir með sigri í fyrsta leik undanúrslitanna á móti Val.

Þrír sigurleikir í röð og síðast unnu Njarðvíkingar fjóra leiki í röð í úrslitakeppni vorið 2014. Þeir geta því í kvöld unnið fjóra leiki í röð í úrslitakeppni í fyrsta sinn í heilan áratug.

Vorið 2014 vann Njarðvík alla þrjá leiki sína á móti Haukum í átta liða úrslitum og fylgdi því síðan eftir með útisigri í Grindavík í fyrsta leik undanúrslitanna. Grindavík vann þó einvígið á endanum 3-2.

Tveir af þessum þremur leikjum á síðustu dögum hafa Njarðvíkingar unnið á útivelli en í kvöld eru Njarðvíkingar á heimavelli í fyrsta sinn í þessum undanúrslitum.

Njarðvíkingar eiga metið yfir flesta sigurleiki í röð í úrslitakeppni en þeir unnu ellefu leiki í röð frá 1985 til 1988.

Leikurinn í kvöld hefst klukkan 19.15 og er sýndur beint á Stöð 2 Sport. Útsendingin hefst klukkan 18.45.