Sigur­ganga Warri­ors á enda og spennan eykst í efri hluta austursins

Topplið Austurdeildarinnar Boston Celtics vann nauman sigur á liði Sacramento Kings þar sem risaleikur De´Aaron Fox fyrir lið Kings dugði ekki til. Gestirnir fengu þrjú tækifæri á síðustu sjö sekúndunum til að taka forystuna en nýttu ekki sénsinn. Lokatölur 101-100 fyrir Boston Celtics.

Fox skoraði 40 stig fyrir Kings en Kristaps Porzingis skilaði 20 stigum og 11 fráköstum fyrir Celtics sem hefur unnið þrettán af síðustu fimmtán leikjum sínum og er með örugga forystu á toppi Austurdeildarinnar. 

Dallas Mavericks batt enda á sex leikja sigurgöngu Golden State Warriors með 108-106 sigri. Mavericks voru án stórstjörnunnar Luka Doncic en PJ Washington steig upp í fjarveru Doncic og átti stórleik.

„Hann var stórskostlegur. Þegar maður sá hvernig hann byrjaði vissi maður að þetta yrði sérstakt kvöld. Þetta er það sem við þurfum, sérstaklega þegar okkur vantar menn í hópinn,“ sagði Kyrie Irving leikmaður Mavericks eftir leik.

Washington kláraði leikinn með 32 stig og skoraði sigurkörfuna tæpum fimm sekúndum fyrir leikslok. Step Curry skoraði 28 fyrir Warriors sem eru í harðri baráttu um að tryggja sér sæti í umspili fyrir úrslitakeppnina.

15-0 áhlaup Phoenix Suns í upphafi leiks lagði grunninn að sigri liðsins gegn toppliði Vesturdeildarinnar Minnesota Timberwolves. Þetta er aðeins í fjórða sinn í vetur sem Suns náði ekki að skora 100 stig í leik en í fyrsta skipti sem það gerist en liðið nær sigri.

Timberwolves er enn án stjörnuleikmanns síns Karl-Anthony Towns en hann lék síðast með liðinu þann 4. mars. Vonast er til að hann snúi aftur fyrir lok deildakeppninnar um næstu helgi.

Kevin Durant var stigahæstur hjá Suns með 22 stig í 97-87 sigri en Devon Booker var rólegri en í síðustu tveimur leikjum þar sem hann hafði skorað annars vegar 40 stig og hins vegar 52 stig gegn New Orleans Pelicans.

Þá tapaði Milwaukee Bucks á heimavelli gegn Toronto Raptors en lið Bucks á í harðri baráttu um hemeimaleikjarétt í fyrstu umferð úrslitakeppninnar. Nú munar aðeins tveimur sigurleikjum á Bucks, Cleveland Cavaliers, Orlando Magic og New York Knicks í sætum tvö til fimm í Austurdeildinni.

Úrslitin í NBA í nótt og staðan í deildinni:

Washington Wizards - Portland Trai Blazers 102-108

Indiana Pacers - Oklahoma City Thunder 126-112

Charlotte Hornets - Orlando Magic 124-115

Boston Celtics - Sacramento Kings 101-100

New Orleans Pelicans - San Antonio Spurs 109-111

Milwaukee Bucks - Toronto Raptors 111-117

Memphis Grizzlies - Detroit Pistons 108-90

Houston Rockets - Miami Heat 104-119

Chicago Bulls - New York Knics 108-100

Dallas Maverics - Golden State Warriors 108-106

Phoenix Suns - Minnesota Timberwolves 97-87

Los Angeles Clippers - Utah Jazz 131-102