„Komin býsna mikil al­vara í málið“

Á miðvikudag var undirritað samkomulag milli ríkis og borgar um kostnaðarskiptingu á byggingu nýrrar Þjóðarhallar. Samhliða því var stofnað félag, Þjóðarhöll ehf., sem mun halda utan um verkið. Miklu hefur verið lofað í málefnum þjóðarhallar í áraraðir en minna verið um efndir.

Því er vert að spyrja hvað sé öðruvísi í þetta skiptið og bendi til þess að ný höll fái loks að rísa.

„Það er einfaldlega þannig að við erum að taka þetta skref fyrir skref og fylgja þessu fast eftir. Þetta var mikilvægur áfangi núna. Svo höldum við bara áfram,“ segir Ásmundur Einar Daðason, mennta- og barnamálaráðherra sem fer með málefni íþrótta. Næst á dagskrá er útboðs- og hönnunarferli.

„Þá er nú komin býsna mikil alvara í málið.“ segir Ásmundur.

Ásmundur segir þetta skref marka ákveðin tímamót. Aldrei hafi málefni hallarinnar komist eins langt og nú og aldrei verið nálægt álíka samkomulagi um kostnaðarliðinn milli ríkis og borgar. Gert er ráð fyrir að verkið kosti um 14 milljarða.

„Þetta hefur náttúrulega aldrei farið svona langt áður. Menn hafa aldrei sest niður og rætt kostnaðarskiptingu, formlega komið sér saman um staðsetningu og svo núna er búið að stofna félag í kringum þennan grunn sem er búið að byggja. Það eru í rauninni ekki margir hjallar eftir.“ segir Ásmundur.

Verkið hefur frestast sem Ásmundur segir stýrast af stýrivaxtahækkunum. Stefnt er að því að höllin verði risin 2027.

„Þegar stýrivextir fóru hækkandi hægði aðeins á verkefninu, sem hefur komið fram. Það sem við erum að sjá núna, miðað við uppfærða tímaáætlun á þessu, reiknum við með að höllin verði tekin í notkun árið 2027.“

Eitt skref í einu

Það er ekki bara Laugardalshöll sem er á undanþágum frá alþjóðasamböndum vegna vankanta. Sömu sögu er að segja af Laugardalsvelli sem er kominn til ára sinna. Vésteinn Hafsteinsson, afreksstjóri ÍSÍ, og Vanda Sigurgeirsdóttir, formaður KSÍ, eru á meðal aðila sem hafa kallað eftir allsherjar uppstokkun í Laugardal og heildaríþróttamiðstöð. Ásmundur segir höllina efsta á lista, aðrir kostir verði skoðaðir í framhaldinu.

„Í framhaldinu þurfum við að taka aðra þjóðarleikvanga til skoðunar. Það eru takmörk fyrir því hvað við getum unnið mörg mál í einu. Þess vegna höfum við sett þjóðarhöllina fyrst. Ég fullyrði það að aldrei hafa eins margir í ráðuneytinu unnið í málefnum íþrótta eins og einmitt þessi misserin,“ segir Ásmundur Einar.