Segir barist fyrir til­vist Rúss­lands

Þetta sagði forsetinn, sem hefur stýrt Rússlandi í rúma tvo áratugi og þykir líklegur til að tilkynna að hann ætli að sitja enn eitt sex ára kjörtímabil, í ræðu sem hann hélt í gærkvöldi.

„Við erum ekki bara að berjast fyrir frelsi Rússlands, heldur alls heimsins,“ sagði Pútín í stóryrtri ræðu sinni í gær.

Hann sakaði Vesturlönd um „Rússahatur“ og hét hann því að berjast gegn viðleitni þeirra til að skipta Rússlandi upp með því að ala á deilum milli mismunandi þjóðarbrota Rússneska sambandsríkisins.

Eins og fram kemur í frétt AP fréttaveitunnar hefur Pútín brugðist hart við öllum mótmælum í Rússlandi og gagnrýni á innrásina í Úkraínu. Mótmælendur hafa fengið þunga fangelsisdóma. Nýjum lögum sem eiga að vernda heiður rússneska hersins hefur verið beitt gegn stökum mótmælendum, samtökum og frjálsum fjölmiðlum í Rússlandi.

Sjá einnig: Dæmd í sjö ára fangelsi vegna límmiða

Pútín sagði einnig í ræðu sinni að Rússar væru að berjast fyrir sanngjarnari heimsskipan en ríkt hefur frá tímum seinni heimsstyrjaldarinnar. Án sjálfstæðs og sterks Rússlands væri stöðug og friðsöm heimsskipan ekki möguleg.

Sagðist þurfa að bjarga fólki

Pútín hefur gefið margar ástæður fyrir innrás Rússa í Úkraínu. En sú algengasta er að Rússar hafi þurft að koma rússneskumælandi fólki í austurhluta Úkraínu til bjargar. Pútín hefur haldið því fram að Úkraínumenn hafi verið að fremja þjóðarmorð á þessu fólki.

Þetta sagði hann meðal annars skömmu eftir innrásina í ávarpi til rússnesku þjóðarinnar og sagði hann að fjórtán þúsund óbreyttir borgarar hefðu fallið í átökunum í austurhluta Úkraínu. Aðrir í Rússlandi og víðar hafa tekið undir þetta og haldið því fram að Úkraínumenn hafi fellt allt þetta fólk.

Þessar ásakanir eru rangar.

Frá því átökin hófust þann 14. apríl 2014, þegar aðskilnaðarsinnar gerðu uppreisn í þessum hluta landsins, með stuðningi Rússa, til 31. desember 2021 féllu 3.404 óbreyttir borgarar í austurhluta Úkraínu, samkvæmt tölum Sameinuðu þjóðanna. Lang flestir þeirra féllu á árunum 2014 og 2015, þegar átökin voru hvað umfangsmest og eru 298 manns sem voru um borð í MH17, flugvél Malaysian Airlines, sem aðskilnaðarsinnar skutu niður með rússnesku loftvarnarkerfi, taldir með.

Sjá einnig: Pútín hafi ákveðið að senda eldflaugina sem notuð var gegn MH17

Árið 2014 dóu 2084 óbreyttir borgarar, samkvæmt tölum Sameinuðu þjóðanna, og árið 2015 dóu 955. Síðustu þrjú árin fyrir innrás Rússa, sem hófst í febrúar 2022, dóu einungis 78 óbreyttir borgarar. 27 árið 2019, 26 árið 2020 og 25 árið 2021.

Sameinuðu þjóðirnar hafa aldrei sagt að þetta fólk hafi allt fallið í árásum Úkraínumanna eins og Rússar hafa haldið fram. Síðustu árin dóu flestir vegna jarðsprengja eða annarra ósprunginna sprengja.

Í tölum Sameinuðu þjóðanna segir að séu bæði úkraínskir hermenn og úkraínskir aðskilnaðarsinnar taldir með, hafi 14.200 til 14.400 manns fallið í átökunum, frá apríl 2014 til loka árs 2021.

Erindreki vísaði í réttar tölur í dómsal

Fyrr á þessu ári vísaði erindreki Rússlands við Alþjóðadómstólinn í Haag í raunverulegar tölur Sameinuðu þjóðanna um látna óbreytta borgara, eða svo gott sem, og sagði rúmlega 3.500 hafa fallið og rúmlega tíu þúsund haf særst, þar á meðal rúmlega hundrað börn, samkvæmt Tass fréttaveitunni, sem er í eigu rússneska ríkisins.

Þetta sagði María Sabolotskaíja vegna lögsóknar Úkraínu gegn Rússlandi.

Hún hélt því fram að Úkraínumenn hefðu aukið árásir sínar í austurhluta Úkraínu í febrúar 2022, fyrir innrás Rússa. Þess vegna hefðu Rússar þurft að koma fólkinu þar til bjargar.

Sérstaklega þar sem tillögur ráðamanna í Rússlandi frá því í desember 2021, sem hefðu átt að tryggja frið í Evrópu, hefði verið hafnað og áhyggjur Rússa hunsaðar. Á þessum tíma höfðu Rússar komið umfangsmiklum herafla fyrir við landamæri Úkraínu.

Þessar tillögur snerust í einföldu máli um það að Atlantshafsbandalagið hörfaði alfarið frá Austur-Evrópu. Að þjóðum sem kusu að ganga inn í bandalagið eftir árið 1997 yrði vísað úr því.

Pólland, Ungverjaland og Tékkland gengu til liðs við Atlantshafsbandalagið árið 1999. Árið 2004 gerðu Búlgaría, Rúmenía og Slóvakía það einnig auk Eystrasaltsríkjanna Eistlands, Lettlands og Litháen. Í kjölfarið af því gengu Albanía, Króatía, Svartfjallaland og Norður Makedónía einnig í NATO.