Bað kærustunnar uppi á sviði í Há­skóla­bíó

Halloween Horror Show, „hryllilegasta tónleikasýning sögunnar,“ skartar mörgu af fremsta tónlistarfólki landsins. Meðal þeirra sem þar koma fram eru Gréta Salóme, Andrea Gylfa, Guðrún Árný, Erpur Eyvindarson og Stebbi Jak.  Dagur Sigurðsson, söngvari, var þó óumdeilanlega stjarna kvöldsins í gær en hann spilaði út óvæntu og hjartnæmu atriði undir lok sýningarinnar.

Þá leiddi maður Elvu Dögg inn á sviðið þar sem Dagur hafði nýlokið við atriði.

„Dagur minn, þú baðst mig um að fara og finna fyrir þig konu, sem þú ættir eitthvað vantalað við,“ sagði maðurinn. „Ég vona að þetta sé rétt kona?“

Þetta er rétt kona, réttur maður á réttum tíma á réttum stað.

„Ég ætla bara að hætta þessu kjaftæði og spurja“

„Fyrir fimm árum bauð ég þessari gullfallegu skvísu, hjartahlýju og frábæru, á Halloween horror show,“ sagði Dagur og uppskar mikinn fögnuð áhorfenda. 

 „Þessi fimm ár hafa verið bestu ár ævi minnar.“

„Ég næ ekki að tala einusinni svo ég ætla bara að hætta þessu kjaftæði og spurja: Elva Dögg, viltu giftast mér?“

Elva þurfti ekki að hugsa sig um og játaði. Eftir innilegan koss undir áköfum fagnaðarlátum innsiglaði Dagur bónorðið með hring.

Ásgeir Helgi Þrastarson náði bónorðinu á myndband, sem sjá má hér að neðan.