Starfs­maður fórst þegar hann sogaðist inn í flug­véla­hreyfil

Málið er nú til rannsóknar en slysið átti sér stað á meðan flugvél Delta Air Lines frá Los Angeles lá við hlið flugstöðvarinnar með einn hreyfil í gangi.

Í yfirlýsingu frá San Antonio flugvellinum segjast stjórnendur vera harmi slegnir vegna málsins og vinni nú með yfirvöldum að rannsókn þess. Frekari upplýsingar verði veittar síðar.

Sky News fjallar um atvikið og hefur eftir flugfélaginu Delta Air Lines að það sé sömuleiðis harmi lostið vegna slyssins og yfir því að missa starfsmann sinn.

„Hjörtu okkar og stuðningur fara til fjölskyldu, vina og ástvina hans á þessum erfiða tíma,“ segir í yfirlýsingu flugfélagsins.

Svipað mál kom upp í Alabama seint á síðasta ári þegar flugvallarstarfsmaður dróst inn í flugvélahreyfil með þeim afleiðingum að hann fórst.