„Þetta eru hálfgerðar hamfarir“

„Ég vona að þetta verði ekki árlegt,“ segir Ólafur.

Í venjulegu árferði opna golfvellir á Íslandi í byrjun maí. Erfiður vetur gerði það hinsvegar ómögulegt.

„Við erum að opna þremur vikum seinna heldur en vanalega. Því fylgir aukið álag á rástímakerfið hjá okkur vegna þess að fólk vill einfaldlega komast í golf,“ segir Ólafur.

Hann er grasvallarsérfræðingur og var vallarstjóri Keilis í sautján ár áður en hann varð framkvæmdarstjóri fyrir tíu árum.

„Ég sló vallarmetið á Hvaleyrarvelli fyrir um tuttugu árum. Þá var ekki stingandi strá á neinni flöt. Ég fór til dæmis holu í höggi á fjórðu holu og þá var slegið af mottu. Vegna þess að teigarnir voru handónýtir.

Þetta hefur allt gerst áður. Þetta er ekkert einsdæmi. Framfarirnar á viðhaldi á golfvöllum á Íslandi hafa verið rosalegar undanfarin ár. Að meðaltali erum við að koma miklu betur út. Vegna þess að það er meiri þekking,“ segir Ólafur.

Hann segir að sú grastegund sem er algengust bæði hér á landi og erlendis hafi nánast þurrkast út. Þetta sé það sem gerðist á fólboltavöllum hér á landi og hafi gert golfvöllum einnig erfitt fyrir.

„Þetta eru hálfgerðar hamfarir. Sérstaklega á völlunum á höfuðborgarsvæðinu. Það sem gerist er að ein grastegundin þurrkast út hjá okkur. Hún heitir poa unnua. Við höfum aldrei lent í því,“ segir Ólafur að endingu.