Manni og barni haldið í Leifs­stöð í þrjá­tíu tíma

„Frænku minni er mjög kalt og hún hóstar,“ segir Elio Hasani, 25 ára albanskur maður sem hefur verið haldið á Leifsstöð í meira en þrjátíu klukkutíma ásamt 15 ára frænku sinni. Lögreglan stöðvaði þau á flugvellinum og neitar honum um inngöngu inn í landið. Verði hann ekki farinn af landi brott í kvöld verði honum vísað úr landið.

„Ég hef ekki orðið vör við svona meðferð áður í málum einstaklinga í sambærilegri stöðu, hvað þá framkomu stjórnvalda við saklaust barn,“ segir Claudia Ashanie Wilson, lögmaður Elio.

Lögregla segi honum að honum hafi verið meinuð landganga þar sem hann hafi ekki heimild til dvalar. Elio hafi hins vegar ekki fengið slíka ákvörðun frá Útlendingastofnun vegna fyrirliggjandi umsóknar hans um endurnýjun.

„Hann hefur ekki séð þessa ákvörðun og hefur hún heldur ekki verið afhent mér þrátt fyrir ítrekaðar beiðnir þar um, bæði til Útlendingastofnunar og lögreglu. Þar af leiðandi hefur hann ekki haft tækifæri til að kæra hana og óska eftir frestun á réttaráhrifum, sé ákvörðunin yfir höfuð til að dreifa,“ segir Claudia.

Foreldrarnir bíða í íbúðinni

Elio flutti hingað til lands átján ára gamall. Hann var í hjónabandi en er nú að skilja og á dóttur sem er á þriðja ári. Foreldrar hans eru í heimsókn frá Albaníu og dvelja í íbúð hans.

„Framkvæmdin hjá Útlendingastofnun núna er með þeim hætti að einstaklingar sem standa í hjónaskilnaði og eru með gild dvalarleyfi njóta áfram heimildar til dvalar, þangað til að dvalarleyfið rennur út og þá verða þeir að sækja um á nýjum grundvelli vegna breyttra aðstæðna,“ segir Claudia.

„Samkvæmt upplýsingum frá umbjóðanda mínum er lögreglan búin að upplýsa hann um að hann þurfi að yfirgefa landið í kvöld annars mun hún leggja á hann brottvísun og endurkomubann til tveggja ára. Það er heimild sem þau hafa ekki samkvæmt útlendingalögum,“ segir hún.

Í köldum klefa í nótt

Lögreglan hafi ekki heimild til brottvísunar heldur aðeins Útlendingastofnun og ákveðið ferli þurfi að fara í gang áður en komið er á það stig. Annað sé langt umfram meðalhóf.

„Lögreglan hefur aðeins heimild til frávísunar. Forsendurnar fyrir því eru að hann hafi ekki heimild til dvalar sem er einfaldlega ekki rétt,“ segir Claudia.

Elio og frænka hans voru í klefa í nótt en núna mega þau fara um flugstöðina. Þau mega hins vegar ekki fara af henni nema í flugvél úr landi. Claudia segist ekki vita til þess að barnaverndaryfirvöld hafi verið látin vita af þessu máli, það er að unglingsstúlka hafi þurft að dvelja við þessar aðstæður í meira en sólarhring.

Stunginn þrisvar á Austurvelli

Þetta er ekki fyrsta áfallið sem Elio hefur orðið fyrir á Íslandi. Í desembermánuði árið 2017 varð hann fyrir alvarlegri stunguárás á Austurvelli þegar maður að nafni Dagur Hoe Sigurjónsson stakk félaga Elio, Klevis Sula, til bana.

Elio var stunginn þrisvar sinnum og var litið á málið sem tilraun til manndráps. Var Elio hætt kominn vegna alvarlegrar slagæðablæðingar en hann fékk stungusár ofarlega á baki, á vinstri öxl, upphandlegg og á vinstri kálfa.

Segist Elio ekki enn hafa jafnað sig á þessari árás. „Ég fékk eiginlega enga aðstoð. Örlitla í byrjun en síðan var mér vísað úr landi í tvö ár,“ segir hann og segist ekki skilja af hverju sé verið að fara svona með hann. Hann reki eigið verktakafyrirtæki, Elio ehf sem sér meðal annars um hellu og parketlagningu. Hann hafi alltaf borgað sína skatta og skyldur.

„Þeir segja að ég verði að yfirgefa landið í kvöld annars verður mér vísað á brott,“ segir hann.