Jólin kláruðust á Egilsstöðum 6. janúar en þau eru ennþá í Njarðvík

„Já við fengum þrjá galopna þrista þegar það voru 2-3 mínútur eftir til að koma þessu niður í einhver 5-6 stig. Svo settu þeir ansi mikið í lokin, en þetta er bara ofboðslega gott Njarðvíkurlið. Skjóta boltanum svakalega vel, eru 50 og eitthvað prósent í dag. Þeir eru bara betri en við hérna í dag en frammistaðan hjá okkur að mörgu leyti bara ágæt þrátt fyrir að við töpum með 19 stigum. Ég held að ég hafi ekki oft sagt þetta!“

Jákvæðnin alltaf í fyrirrúmi hjá Viðari, sem sagðist geta tekið margt jákvætt útúr þessum leik þrátt fyrir tap.

„Það var margt gott í þessu, engin spurning. Aulalegir tapaðir boltar inn á milli sem gefa þeim auðveldar körfur sem við þurfum auðvitað að „kötta“ í burtu og hefur nú kannski ekki verið mikið um hjá okkur. Oft bara fínn varnarleikur hjá okkur þar sem þeir setja erfið skot, en líka stundum opin skot í hornunum sem við ætluðum einhvern veginn bara að pikka. Við getum ekki stoppað allt í svona ofboðslega öflugu liði. Bara kredit á þá, frábært sóknarlið. Þeir voru bara betri og þess vegna unnu þeir.“

Án þess að vilja verja öllu viðtalinu í að láta Viðar tala um andstæðingana, þá spurði blaðamaður hann samt út í þessa breidd sem Njarðvík hefur á að skipa. Það er erfitt að eiga við hana í hröðum leik eins og þessum.

„Já það er mikil dýpt. Þeir rótera hérna inná einhverjum 11 köllum. Elías Pálsson kemur inn og það er ekkert hægt að fara af honum. Rasio setur tvo þrista og eitthvað. Jólin kláruðust á Egilsstöðum 6. janúar en þau eru ennþá í Njarðvík. Ég held að þeir ættu að fara að taka snúrurnar úr sambandi.“