Ein af meistarahetjum Golden State Warriors samdi við Portland Trail Blazers

Payton gerði þriggja ára samning við Portland og fær fyrir þau 28 milljónir dollara eða 3,7 milljarða íslenska króna.

Payton annar er sonur NBA-goðsagnarinnar Gary Payton sem gekk á sínum tíma undir gælunafninu „Hanskinn“.

Payton vann sig inn í lið Golden State á síðasta tímabili eftir að hafa gengið frekar illa að finna sig í byrjun ferilsins.

Hann fékk mikilvægt varnarhlutverk hjá Golden State liðinu og var meðal annars sá sem stal flestum boltum í deildinni á hverjar 36 mínútur spilaðar.

Payton var með 7,1 stig, 3,5 fráköst og 1,4 stolna bolta í leik í deildarkeppninni.

Payton missti af mánuði af úrslitakeppninni eftir að hann braut bein í olnboga þegar hann lenti illa eftir ljótt brot en snéri til baka í lokaúrslitunum.