Úkraínska landsliðið óskar eftir frestun á umspilsleik

Leikur liðanna á að fara fram á Hampden Park í skosku borginni Glasgow þann 24. mars næstkomandi, en allur fótbolti í Úkraínu hefur verið settur á ís eftir innrás Rússa í landið.

Umspilsleikur Úkraínu gegn Skotum er í raun undanúrslitaleikur, en sigurvegarinn mætir annað hvort Wales eða Austurríki í hreinum úrslitaleik um laust sæti á HM.

Alþjóða knattspyrnusambandið FIFA segir að verið sé að leita lausna í samvinnu við knattspyrnusamband Evrópu, UEFA, og skoska knattspyrnusambandið.

Talsmaður FIFA sem staðfesti beiðni úkraínska liðsins sagði einnig að látið yrði vita þegar meiri upplýsingar væru til staðar, og sýndi Úkraínumönnum um leið samstöðu.

„FIFA lýsir yfir samstöðu sinni við alla þá sem hafa orðið fyrir áhrifum af því sem er að gerast í Úkraínu. Við munum láta vita af stöðu mála um leið og við getum.“