Ætti ekki að vera feimnis­mál að hjón leiti sér að­stoðar

Sigga Sigurjóns þekkja allir, enda einn okkar ástsælasti leikari. Hann hefur leikið í hinum ýmsu kvikmyndum og sjónvarpsþáttum og ber þar helst að nefna Spaugstofuna. Lísa Harðardóttir, betri helmingur Sigga, hefur starfað á leikskóla í Hafnarfirði í 25 ár og er því óhætt að segja að hún hafi tekið stóran þátt í uppeldi Hafnfirðinga.

Þau Siggi og Lísa voru gestir í 45. þætti af hlaðvarpinu Betri helmingurinn með Ása sem hóf göngu sína síðasta vor. Umsjónarmaður þáttanna er Ásgrímur Geir Logason. Hann fær til sín þjóðþekkta einstaklinga ásamt þeirra betri helming og ræðir um ástarsambandið, lífið og tilveruna.

Var í gifsi upp að nára þegar þau áttu fyrsta dansinn

„Ég var mikill skáti í gamla daga og var alltaf í þeim og endaði síðan í Hjálparsveitinni. Þar lágu leiðir okkar saman, í Hjálparsveit skáta í Hafnarfirði,“ segir Siggi um það hvernig hann kynntist sinni heittelskuðu Lísu fyrir 45 árum síðan.

„Ég var í Flensborg. Ég og vinkona mín sáum auglýsingu að það væri verið að taka inn nýliða í hjálparsveitina og ákváðum að skella okkur,“ segir Lísa.

Það var svo eitt kvöldið á þorrablóti Hjálparsveitarinnar sem þau dönsuðu saman og eftir það var ekki aftur snúið.

„Þetta var nú ekkert svo flókið. Heppnin var með mér því hún Lísa hafði lent í íþróttaslysi og var í gifsi alveg upp í nára, þannig hún fór mjög hægt yfir, þannig hún var auðveld bráð. Ég náði henni þarna og hún gat ekki hlaupið undan og hér erum við.“

Trúlofuðust í Hyde Park

Á þessum tíma var stefnumótamenningin aðeins einfaldari en hún er í dag.

„Þetta bara spurning um að fara á ball og ná sér í stelpu og bjóða henni upp í dans. Ef það gekk vel þá var það bíó á sunnudeginum. Ef það gekk vel þá var þetta nú bara komið svona langleiðina.“

Siggi var nýútskrifaður leikari þegar hann og Lísa fóru að vera saman. Leiklistin var hans helsta ástríða og þurfti oft að aðlaga fjölskyldulífið að henni. Sem dæmi um það var sunnudagsmaturinn borðaður á mánudögum, því þá var frí í leikhúsinu.

Í brotinu hér að neðan má heyra söguna af því þegar Siggi og Lísa trúlofuðu sig í Hyde Park í London.

Ekkert feimnismál að leita sér aðstoðar

Í dag hafa þau verið gift í 37 ár og eiga þau stóra fjölskyldu sem samanstendur af þremur börnum og sjö barnabörnum. Þau skafa þó ekkert af því að sambandið hefur ekki verið áreynslulaust í öll þessi ár.

„Það hafa auðvitað verið skaflar á leiðinni, svo sannarlega, og það er ekkert feimnismál. Við höfum ekkert flutt að heiman og það hefur aldrei verið aðskilnaður eða neitt slíkt,“ segir Siggi.

„En vissulega hafa verið hraðahindranir einhvers staðar á leiðinni en okkur hefur nú blessunarlega séð tekist að komast yfir þær. Það hefur alveg tekið á en þetta er bara spurning um gagnkvæmt traust og að tala saman og jafnvel leita sér aðstoðar og vera ekkert feimin við það.“

Fyrir mörgum árum ákváðu þau að leita sér aðstoðar í sambandinu og segja þau það hafa gert þeim báðum afar gott. 

„En er það ekki líka svolítið þannig að þegar fólk eldist saman þá mynstrast það saman með árunum? Maður lærir svo vel á hvort annað og verður umburðarlyndari og lærir að líta í hina áttina. Svo dofnar heyrnin með árunum sem er mikill kostur í þessu tilliti,“ segir Siggi á léttu nótunum.

Lögreglan þurfti að halda niðri í sér hlátrinum

Spaugstofan var einn vinsælasti skemmtiþáttur landsins í fjölmörg ár og hafði það vissulega áhrif að vera svo þekkt andlit á Íslandi. Lísa segir frá því að á tímabili hafi þau forðast það að fara út að borða á veitingastöðum vegna athyglinnar.

„Auðvitað fengum við send bréf og það var skrifað í blöðin að við hefðum farið yfir strikið og svoleiðis. Þarna var auðvitað ekki Facebook eða samfélagsmiðlar, þá hefði sennilega allt orðið vitlaust annað slagið.“

Siggi segir frá því þegar þættinum bárust kærur í tvígang, fyrst fyrir það að sýna klám og síðar fyrir guðlast. 

„Við vorum kallaðir til lögreglu og þurftum að gefa skýrslu hver og einn og svara því hver átti hugmyndina og hver hefði skrifað þetta. Svo sat lögreglan þarna á móti okkur og þeir þurftu bara að halda niðri í sér hlátrinum. Þeir þurftu bara að sinna sinni vinnu en þeim fannst þetta innst inni alveg galið held ég.“

Fórnaði sér fyrir Lísu

Í þættinum rifja þau upp eftirminnilega veiðiferð þar sem Lísu tókst einhvern veginn að krækja í eina kríu í bakkastinu.

„Svo kallar Lísa á mig: „Siggi minn nennirðu að losa kríuna af fyrir mig?“. Við vorum svona tiltölulega nýbyrjuð saman þarna, þannig ég gat nú ekki skorast undan. Svo þarna þurfti ég að vaða inn í kríuvarpið og losa eina frænkuna af önglinum með svona fimm þúsund ættingja hennar þarna við hliðina á. Skallinn á mér er rétt svo farinn að gróa núna,“ en kríurnar tóku ófáar dýfurnar á Sigga.

„En hvað gerði maður ekki fyrir ástina sína á þessum tíma?“

Hér að neðan má hlusta á viðtalið við þau Sigga og Lísu í heild sinni.