Mun stýra starfshópi um barnaheimilið á Hjalteyri

Atli Ísleifsson skrifar 7. desember 2021 11:10

Vigdís Häsler Sveinsdóttir lögfræðingur. Stjórnarráð Íslands

Jón Gunnarsson innanríkisráðherra hefur skipað þriggja manna starfshóp undir forystu Vigdísar Häsler Sveinsdóttur lögfræðings til að afla nauðsynlegra gagna og upplýsinga um starfsemi heimilisins á Hjalteyri.

Starfshópnum er ætlað að afla gagnanna til að unnt sé að taka ákvarðanir um hvort og með hvaða hætti starfsemin verði tekin til frekari rannsóknar og þá hver aðkoma viðkomandi sveitarfélaga skuli vera.

Frá þessu segir í tilkynningu á vef dómsmálaráðuneytisins. Aðrir í starfshópnum eru Ásgeir Örn Blöndal Jóhannsson, lögmaður, og Halldór Þormar Halldórsson, umsjónarmaður sanngirnisbóta. Þá segir að starfsmaður hópsins sé Ingibjörg Gyða Guðrúnardóttir, tengiliður sanngirnisbóta.

Kastljósinu hefur verið beint að starfsemi barnaheimilisins á Hjalteyri, sem starfrækt var í Richardshúsi á áttunda áratugnum, í kjölfar umfjöllunar fréttastofu.

Í tilkynningu á vef ráðuneytisins segir að löggjöfin sem gilti um starfsemi vistheimilanefndar, lög nr. 26/2007 um skipan nefndar til að kanna starfsemi vist- og meðferðarheimila fyrir börn, hafi verið felld úr gildi þar sem ekki hafi verið talin þörf á frekari könnunum vistheimilanefndar til að ljúka uppgjöri sanngirnisbóta.

„Verkefni hins nýstofnaða starfshóps munu ná til þess að lýsa tildrögum að starfsemi heimilisins, lýsa því hvernig opinberu eftirliti var háttað og skila tillögum til stjórnvalda um frekari viðbrögð og afmörkun verkefnisins. Hópurinn á að lokum að lýsa þeim lagahindrunum sem eru fyrir frekari rannsókn málsins og eftir atvikum að leggja fram tillögu að því hvort niðurstöður starfshópsins kalli á lagabreytingar. Miðað er við að starfshópurinn taki meðal annars til nánari skoðunar rannsóknir og skýrslur vistheimildanefndar.

Starfshópurinn hefur þegar tekið starfa,“ segir í tilkynningunni.

Bæjarstjóri fagnar

Ásthildur Sturludóttir, bæjarstjóri Akureyrar, segist í færslu á Facebook fagna því að fram fari ítarleg rannsókn á starfsemi vistheimilisins.

„Sýnir að dómsmálaráðherra Jón Gunnarsson ætlar að taka þetta mál föstum tökum. Það er mikilvægt að þetta tímabil vistheimila á Íslandi verði gert upp í eitt skipti fyrir öll og að hlustað verði á þá einstaklinga sem þar dvöldu. Í mínum huga skiptir ekki máli hvort heimilin voru rekin af ríki, sveitarfélögum, félagasamtökum eða einstaklingum eins og á Hjalteyri - rannsókn á allri þessari starfsemi þarf skilyrðislaust að fara fram,“ segir Ásthildur.

Barnaheimilið á Hjalteyri Hörgársveit Akureyri Stjórnsýsla Ríkisstjórn Katrínar Jakobsdóttur Vistheimili

Tengdar fréttir

Daglegar pyntingar á Hjalteyri og enginn vildi hlusta

Enn og aftur stígur fram maður sem segist hafa verið beittur hræðilegum pyntingum af hjónum sem ráku barnaheimili á Hjalteyri á áttunda áratug síðustu aldar. Hann hefur í áranna rás reynt að ná eyrum yfirvalda til að fá hjónin rannsökuð en segist aldrei hafa fengið áheyrn.

5. desember 2021 20:30

Tóku barn úr vistun vegna grunsamlegrar hegðunar Hjalteyrarhjónanna: Létu Garðabæ vita

Garðabær fékk ítrekað ábendingar og eða kvartanir vegna hjóna sem önnuðust fjölda barna í bænum að sögn foreldra sem voru með barn í leikskóla hjá þeim. Foreldrarnir segjast hafa ákveðið að taka barnið sitt úr skólanum vegna grunsamlegrar hegðunar þeirra. Hjónin sem hafa verið ásökuð um ofbeldi og pyntingar gagnvart börnum störfuðu í 17 ár í Garðabæ. Maður sem var hjá þeim á Hjalteyri segist hafa reynt að láta Garðabæ og önnur yfirvöld vita af ofbeldinu sem þau beittu þar.

5. desember 2021 18:30