Segja á­falla­þol og ó­rofinn rekstur grund­völl öryggis ferða­þjónustu­fyrir­tækja

Í tilkynningu sem samtökin þrjú sendu frá sér í morgun segir að yfirlýsingar og fyrirmæli stjórnvalda og sóttvarnaryfirvalda séu á þann veg að ekki séu aðrar leiðir færar en hjarðónæmi þar sem bólusettir einstaklingar geta verið smitberar eins og aðrir þrátt fyrir að bólusetningar veiti mjög góða vörn gegn alvarlegum veikindum.

Því sé ljóst að framundan sé tímabil sem getur markast af óvissu og truflunum á starfsemi fyrirtækja í tengslum við sóttkví og því mikilvægt að fyrirtæki hugi að og uppfæri viðbragðsáætlanir sínar til að tryggja áfallaþol og órofinn rekstur. 

Almannavarnir koma tilmælum til ferðaþjónustunnar

Jóhannes Þór Skúlason, framkvæmdastjóri Samtaka ferðaþjónustunnar, segir í samtali við Vísi að samtökin þrjú hafi fundað með almannavörnum í vikunni og að þær hafi bent á nokkur atriði sem mikilvægt væri að skerpa á.

Samtök ferðaþjónustunnar, Ferðamálastofa og Leiðsögn – stéttarfélag leiðsögumanna vilja því í sameiningu benda ferðaþjónustufyrirtækjum á eftirfarandi:

• Áhersla á sóttvarnir á vinnustöðum og persónulegar sóttvarnir er enn afar mikilvæg svo hemja megi útbreiðslu smita og draga úr álagi á heilbrigðiskerfið. Sjá t.d. Hreint og öruggt verkefnið á vef Ferðamalastofu.
• Rekstraraðilum er bent á að minna starfsfólk á að fara í sýnatöku ef einkenna verður vart og að hvetja starfsfólk til að þiggja bólusetningu, enda veitir hún mjög góða vörn gegn alvarlegum veikindum.
• Rekstraraðilar þurfa að uppfæra viðbragðsáætlanir sínar með sveigjanleika til lengri tíma í huga til að tryggja órofna starfsemi sem best. M.a. getur þurft að huga að hólfaskiptingu og gera prófanir á viðbragðsáætlunum vegna smita.
• Mikilvægt er að gæta að skörun milli vakta eins og kostur er. Þannig má minnka hættuna á að fjöldi starfsfólks fari í sóttkví á sama tíma ef upp koma smit.
• Skynsamlegt er að miða áætlanir við afleiðingar frekar en atburði og að gera prófanir á viðbrögðum.
• Ekki er hægt að gera ráð fyrir að smitaður einstaklingur geti unnið að heiman í einangrun.
• Rekstraraðilum er bent á að hafa kennitölur, netfangalista og símanúmer starfsmanna tilbúin vegna smitrakningar og tilgreina tengilið vegna hennar.

Ekki sé verið að skamma ferðaþjónustufyrirtæki

Jóhannes Þór segir að ástæða þess að samtökin impra á sóttvörnum sé ekki vegna þess að sóttvarnir ferðaþjónustufyrirtækja hafi verið bágbornar undanfarið heldur sé einfaldlega gott að minna á þær.

Hann segir að aðalatriðið frá sjónarhóli ferðaþjónustunnar sé að nú virðist sem faraldurinn muni fylgja samfélaginu næstu árin. Því sé mikilvægt að benda á að góðar sóttvarnir valdi minni truflun á rekstri fyrirtækja en að starfsfólk smitist eða þurfi í sóttkví.

Þannig haldist hagsmunir ferðaþjónustunnar og allra landsmanna í hendur í baráttunni við veiruna.

Samtökin þrjú segja ferðaþjónustuna eina af grunnstoðum samfélagsins og því mikilvæg öllum landsmönnum. Landsmenn njóti ekki einungis þjónustu hennar til dæmis yfir sumartímann heldur sé ferðaþjónusta undirstaða atvinnulífs víða á landsbyggðinni.

Samtal ferðaþjónustunnar við hagaðila á komandi misserum verði við þessar aðstæður mikilvægara en nokkru sinni fyrr. Með samstilltu átaki munum við komast á þann stað að geta lifað, og starfað, með veirunni.