Blikar þegar með fleiri mörk en helmingur liðanna í fyrra en mæta KR-grýlunni

Blikar hafa raðað inn mörkum í undanförnum leikjum og unnið þrjá sigra í röð, gegn FH, HK og Leikni, með markatölunni 11-2.

Breiðablik hefur skorað langflest mörk liðanna í Pepsi Max-deildinni í sumar, eða 28 mörk í 11 leikjum. Það gerir 2,5 mörk í leik.

Þó að mótið sé aðeins hálfnað hafa Blikar því skorað fleiri mörk en sex af liðunum í deildinni gerðu í fyrra, þegar mótinu var slitið eftir að flest lið höfðu leikið 18 leiki. Árið 2019 náðu þrjú lið ekki þeim markafjölda sem Blikar hafa þegar náð, þrátt fyrir að spila 22 leiki.

KR unnið fimm í röð gegn Breiðabliki

Engu að síður hafa tvö lið haldið marki sínu hreinu gegn Breiðabliki í sumar og annað þeirra er mótherji liðsins í kvöld; KR. KR er eina gestaliðið sem hefur skorað á Kópavogsvelli í sumar, í 2-0 sigri í upphafi móts, en síðan þá hafa Blikar unnið alla fimm heimaleiki sína með markatölunni 18-0.

Óskar Örn Hauksson og Kennie Chopart skoruðu mörk KR í Kópavogi, í fimmta sigri KR-inga í röð gegn Blikum í úrvalsdeildinni.

Blikar hafa raunar bara unnið tvo af síðustu 15 deildarleikjum sínum við KR, og ekki sótt sigur í Frostaskjól síðan árið 2012. Andri Rafn Yeoman er sá eini í Blikaliðinu í dag sem getur rifjað upp þann sigur.

KR-ingar hafa unnið báða leiki sína eftir heimkomu Theódórs Elmars Bjarnasonar, gegn KA og Keflavík, en hann kom inn á sem varamaður gegn Keflvíkingum í síðasta leik.

KR er með 21 stig eftir 12 leiki, stigi á eftir Breiðabliki sem reyndar á leik til góða, en með sigri í kvöld kæmust KR-ingar upp fyrir Breiðablik og Víking í 2. sæti deildarinnar.

Bein útsending frá leik KR og Breiðabliks hefst klukkan 19.15 á Stöð 2 Sport. Þar verður farið yfir leiki dagsins í Pepsi Max Stúkunni strax eftir leik, en í dag mætast KA og HK klukkan 16 og svo FH og Fylkir klukkan 19.15. Alla leiki Pepsi Max-deildarinnar má finna í gegnum sjonvarp.stod2.is.

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.