Spá um 7. og 8. sæti í Pepsi Max kvenna: Mikið um nýja útlendinga í báðum liðum

Íþróttadeild Vísis og Stöðvar 2 Sports spáir fyrir um gengi liðanna í Pepsi Max-deild kvenna í fótbolta en keppni í deildinni hefst með tveimur leikjum þriðjudagskvöldið 4. maí næstkomandi.

Næst skoðum við liðin sem við spáum að verði í fallbaráttu en takist að bjargi sér. Þetta eru liðin í sjöunda og áttunda sæti.

Þróttur og ÍBV eiga það sameiginlegt að treysta mikið á öfluga erlenda leikmenn og á báðum stöðum hafa orðið miklar breytingar á aðkomuleikmönnum liðsins.

ÍBV í 8. sæti: Mikil óvissa með öllum þessum nýju útlendingum

Það hefur svo sem lítið breyst í Vestmannaeyjum á einu ári því kvennalið félagsins er áfram eitt stórt spurningamerki og mætir til leiks með fullt af nýjum erlendum leikmönnum alveg eins og sumarið 2020. Liðið náði að halda sæti sínu í fyrra en það munaði ekki miklu að Eyjakonur væri að spila í Lengjudeildinni í sumar.

Enn á ný þarf því að setja saman nýtt lið í Vestmannaeyjum og þar liggur þessi mikla óvissa um hvar liðið stendur í upphafi móts. Fáir opinberir æfingaleikir eru heldur ekki að hjálpa mikið til.

Það eru aftur erlendu leikmennirnir sem þurfa að halda uppi leik liðsins og þótt að ungu heimastelpurnar séu einu ári eldri og reynslunni ríkari þá mun frammistaða nýju útlendinganna ráða mestu um gengi Eyjaliðsins í sumar.

ÍBV heldur reyndar öflugum leikmönnum eins og þeim Elizu Spruntule, Hönnu Kallmaier og Olgu Sevcova en liðið missir líka sterka leikmenn líka eins og þær Karlinu Miksone, Miyuh Watford og Fatma Kara. Kara fékk fyrirliðabandið á sínu fyrsta og eina ári í Eyjum.

Andri Ólafsson er á sínu öðru tímabili með Eyjakonur en það er ekki eins og hann geti mikið byggt ofan á síðasta tímabil. Hann er aftur að setja saman nýtt lið. Einn mikilvægasti þáttur í hans starfi var vinnan á erlenda félagsskiptamarkaðnum í vetur og hversu vel honum tókst til þar mun ráða mestu um það hvort Eyjaliðið komist eitthvað ofar í töflunni en undanfarin sumur.

Eyjaliðið er því líklegt til að vera áfram í fallbaráttunni áður en annað kemur í ljós. Nýliðarnir eru fyrir neðan þær í spánni en eins og var með spútniklið Þróttara í fyrrasumar þá gæti opnast hleri sem Eyjakonur vilja alls ekki detta ofan í.

Síðasta tímabil

Eyjakonur enduðu í áttunda sætinu eins og árið á undan en voru hins vegar mun nærri því að falla. ÍBV hafði bara eins stigs forskot á FH þegar tímabilið var flautað af þegar liðin áttu tvo leiki eftir.

ÍBV vann Þrótt naumlega í sjö marka leik í fyrstu umferð en tapaði sínum fjórum leikjum í röð. Þá var útlitið ekki bjart en einn góður mánuður bjargaði sumrinu.

ÍBV liðið náði í þrettán stig af fimmtán mögulegum í fimm leikjum á rúmum mánuði frá lok júlí fram í lok ágúst og sú stigasöfnuna lagði grunninn að því að liðið hélt sér í deildinni.

ÍBV fékk aðeins eitt stig í síðustu sex leikjunum og engin önnur en Karlina Miksone skoraði fyrir liðið eftir 20. ágúst eða á síðustu 714 mínútum liðsins á sumrinu.

Liðið og leikmenn

Jú eins og áður sagði þá er þetta nánast nýtt lið í Vestmannaeyjum. Átta erlendir leikmenn gætu skipað byrjunarliðið og þarf eru fimm þeirra nýkomnar til Vestmannaeyja.

Tveir markahæstu leikmenn ÍBV frá því í fyrra, Karlina Miksone og Miyah Watford, koma ekki aftur og sömu sögu má segja af fyrirliðanum Fatma Kara. Þessar þrjár skoruðu ellefu af sextán deildarmörkum liðsins í fyrrasumar.

Olga Sevcova kom að tólf mörkum í fyrra (3 mörk, 5 stoðsendingar og 4 hjálparsendingar) og hún verður áfram í stóru hlutverki sem og reyndi lettneski varnarmaðurinn Eliza Spruntule. Síðan eru að koma til liðsins fimm nýir erlendir leikmenn sem gætu gert frábæra hluti en gætu líka ollið miklum vonbrigðum.

Lykilatriði var þó að endurheimta heimakonuna Clöru Sigurðardóttur eftir eitt ár á Selfossi. Clara ætti að geta stýrt umferðinni á miðjunni. Júlíana Sveinsdóttir er líka orðin reynslubolti sem þarf að skila sínu ef vel á að fara.

Gæti sprungið út

Það þarf auðvitað öflugt Eyjahjarta í þetta ÍBV lið með öllum þessum erlendu leikmönnunum og þar gæti varnarmaðurinn Ragna Sara Magnúsdóttir komið sterk inn. Ragna Sara er bara átján ára gömul en hefur verið byrjunarliðsmaður í liðinu undanfarin tvö sumur. Þetta gæti verið sumarið sem þessi efnilegi leikmaður tekur næsta skref.

Sérfræðingur Pepsi Max marka kvenna segir ...

Árni Freyr Guðnason segir álit sitt á liði ÍBV í Pepsi Max-deild kvenna.

Þróttur R. í 7. sæti: Annað árið reynist spútnikliðunum oft erfitt

Það var gaman að fylgjast með nýliðunum úr Laugardalnum standa sig svona vel síðasta sumar og fimmta sætið var frábær árangur hjá liðið sem hafði ekki spilað í efstu deild í fimm ár. Þá höfðu Þróttarar allt að vinna en að þessu sinni er miklu meiri pressa á liðinu að fylgja þessum góða árangri eftir.

Þjálfarinn Nik Anthony Chamberlain er á sínu sjötta tímabilið með liðið og hefur á þeim tíma tekist að gerbreyta allri umgjörð liðsins. Hann hefur byggt liðið upp hægt og rólega og Þróttarastelpurnar hafa tekið framfaraskref á hverju ári.

Það spáðu flestir þeim tíunda og síðasta sætinu í fyrrasumar og því kom gott gengi þeirra svo mikið á óvart. Það sýndi samt svo vel hvað Nik er að gera flotta hluti.

Hann virðist líka kunna það betur en flestir að finna sterkar erlenda leikmenn því liðstyrkurinn að utan var frábær í fyrra. Vandamálið er að hann er þar nánast á byrjunarreit því þessir öflugu leikmenn koma ekki aftur. Ein þeirra endaði hjá Íslandsmeistaraefnum Vals en það var bakvörðurinn marksækni og frábæri Mary Alice Vignola.

Það er löngu sannað að það er eitt að koma óvart og annað að ná stöðugleika í efstu deild. Annað árið reynist spútnikliðunum oft mjög erfitt og nú er það undir Þrótturum komið að sýna að síðasta sumar hafi ekki verið nein tilviljun.

Það væri ekki alslæmt að enda í sjöunda sæti þótt að metnaður Nik og stelpnanna liggi örugglega ofar. Það mikilvægasta er að festa liðið í sessi í Pepsi Max deildinni svo hægt sé að byggja upp stöðugt úrvalsdeildarlið í Laugardalnum.

Síðasta tímabil

Þróttur kom öllum á óvart með frábærri frammistöðu í Pepsi Max deildinni en nýliðarnir enduðu að lokum í fimmta sæti deildarinnar. Erlendu leikmennirnir bættu miklu við Þróttaraliðið og ungu heimastúlkurnar stigu skrefið meðal þeirra bestu. Það munaði líka mikið um að fá markaskorarann unga Ólöfu Sigríði Kristinsdóttur á láni frá Val en hún bætti miklu við framlínuna.

Aðeins efstu tvö liðin, Breiðablik og Valur, skoruðu fleiri mörk en Þróttaraliðið sem var með 28 mörk í sextán leikjum eða átta meira en Þór/KA og sex mörkum meira en Fylkir. Þróttur fékk líka á sig 34 mörk þannig að það var mikið fjör í leikjum liðsins.

Þróttarakonur unnu kannski bara fjóra leiki en þær töpuðu líka færri leikjum en liðin í kringum sig eins og Selfoss, Stjarnan og Þór/KA.

Þróttur byrjaði á tveimur tapleikjum og vann kannski bara einn af fyrstu tíu leikjum sínum en var taplaust í síðustu fjórum leikjum. Tveir síðustu leikir tímabilsins unnust síðan sannfærandi á Selfossi og KR með markatölunni 8-1 þar sem Þróttaraliðið skoraði sjö mörk í fyrri hálfleik. Þessi frábæri endir gerði mikið fyrir lokastöðuna.

Liðið og leikmenn

Það er mikil breyting á Þróttaraliðinu enda missti liðið fjóra algjöra lykilmenn frá því í fyrra. Þær Stephanie Ribeiro, Mary Alice Vignola og Ólöf Sigríður Kristinsdóttir skoruðu saman 22 mörk af þeim 28 sem liðið skoraði og þá stjórnaði Ástralinn Laura Hughes umferðinni á miðjunni. Allar eru þær horfnar á brott og þar voru skilin eftir stór skörð.

Nik Anthony Chamberlain þjálfari gerði vel í útlendingamálunum fyrir síðasta tímabil og Þróttarar treyst á það að honum takist jafnvel upp í ár. Fjórir nýir erlendir leikmenn koma til liðsins og það er búið við miklu af miðjumanninum Katie Cousins og framherjanum Shaelan Murison.

Kletturinn Álfhildur Rósa Kjartansdóttir á miðjunni er kannski bara 21 árs gömul en hún er á þriðja ári sem fyrirliði liðsins. Hin átján ára gamla Andrea Rut Bjarnadóttir átti líka átta stoðsendingar í fyrra og var mjög ógandi með sendingar sínar í föstum leikatriðum.

Það eru tækifæri til að bæta varnarleikinn og liðið fékk fyrir tímabilið markvörðinn Írisi Dögg Gunnarsdóttur frá Breiðabliki og svissneska landsliðsbakvörðinn Lorenu Baumann. Þá ætti Shea Moyer að styrkja liðið inn á miðjunni.

Gæti sprungið út

Það var búist við miklu af Lindu Líf Boama í fyrra eftir flott tímabil í Lengjudeildinni 2019 þar sem hún skoraði 22 mörk í 18 leikjum. Linda Líf var hins vegar óheppin með meiðsli í fyrra og náði aðeins að byrja fjóra leiki. Eitt mark í sex leikjum var því langt undir væntingum en nú ári síðar er tækifæri fyrir Lindu Líf að sanna mikilvægi sitt í Þróttaraliðinu og stimpla sig inn sem markaskorari í Pepsi Max deildinni.

Sérfræðingur Pepsi Max marka kvenna segir ...

Lilja Dögg Valþórsdóttir segir álit sitt á liði Þróttar í Pepsi Max-deild kvenna.