Milljónir í sektir vegna dómaraskorts

HSÍ er heimilt að sekta félög um 5.000 krónur fyrir hvern meistaraflokksleik sem félag leikur án þess að hafa útvegað tilskyldan fjölda dómara.

Sem dæmi má nefna að FH á að útvega fjóra dómara en hefur aðeins tilnefnt þrjá. Á yfirstandandi leiktíð hefur karlalið FH leikið 15 leiki og kvennaliðið 12 leiki, og lið FH því samtals 27 leiki. Það þýðir sekt upp á 135.000 krónur.

Staðan hjá FH er þó betri en hjá mörgum öðrum. Félög á borð við Stjörnuna og Gróttu ættu að útvega fjóra dómara hvort en útvega engan. Samtals greiða félögin milljónir í sektir til HSÍ vegna dómaraskorts.

Aðeins Fram, Haukar, KA og Selfoss tilnefna nægilega marga dómara samkvæmt kröfum dómaranefndar. Fram er með flesta dómara eða sjö.

Reynir Stefánsson, formaður dómaranefndar HSÍ, segir það miður að félögin skuli ekki standa sig betur í að ala upp dómara.

„Þetta hefur staðið í stað síðustu ár. Það eru alltaf sömu félögin sem standa sig og svo hin sem standa sig ekki en nota bara einhverjar afsakanir,“ sagði Reynir.