Í dag tilkynnti Keflavík að félagið hefði samið við 28 ára gamlan framherja frá Bandaríkjunum. Sá heitir Christian Volesky og á að vera varaskeifa fyrir Joey Gibbs ef marka má tilkynningu Keflvíkinga.
Volesky hefur allan sinn feril leikið í Bandaríkjunum og það verður því forvitnilegt að sjá hvernig honum tekst til á Íslandi. Keflvíkingar hafa verið einkar heppnir með erlenda leikmenn og gæti Volesky verið enn demanturinn sem þeir landa.
Þá samdi Keflavík á dögunum við Oliver James Torres og mun hann leika með liðinu í sumar. Hann var í herbúðum Kormáks/Hvatar á Blönduósi síðasta sumar er liðið komst í úrslitakeppni 4. deildarinnar.
Oliver James Torres er nýr leikmaður Keflavíkur! Ollie er Ástrali og spilaði á seinasta tímabili með Kormáki/Hvöt! pic.twitter.com/2xNxVel9rR
— Keflavík Fc (@FcKeflavik) March 25, 2021
Torres kemur frá Ástralíu og skoraði alls 11 mörk í 14 leikjum fyrir Kormák/Hvöt síðasta sumar.
Keflavík heimsækir Víking í fyrstu umferð Pepsi Max-deildarinnar í ár. Leikurinn fer fram föstudaginn 23. apríl eins og staðan er í dag.
