Stór­skota­hríð Bayern en PSG yfir í hálf­leik

PSG er með 3-2 forystu fyrir síðari leikinn gegn Bayern Munchen í átta liða úrslitum Meistaradeildarinnar. Þrátt fyrir stórskotahríð Bæjara tókst þeim að tapa leiknum.

Það voru ekki liðnar nema rúmar tvær mínútur er PSG komst yfir. Neymar kom boltanum þá á Kylian Mbappe og Frakkinn þrumaði boltanum, nánast í gegnum Manuel Neuer, og í netið.

Á 28. mínútu var staðan orðinn 2-0. Eftir hornspyrnu vippaði Neymar boltanum aftur inn á teiginn, rangstöðugildra Bæjara klikkaði og varnarmaðurinn Marquinhos kom boltanum í netið.

Hann þurfti þó að fara af velli skömmu síðar vegna meiðsla eftir magnaða frammistöðu fyrsta hálftímans.

Eric Maxim Choupo-Moting kom til Bayern í sumar frá PSG og hann byrjaði í stað Robert Lewandowski sem var frá vegna meiðsla. Hann þakkaði traustið með marki á 37. mínútu.

PSG var 2-1 yfir í hálfleik en bæði lið fengu góð færi í upphafi síðari hálfleiks til að skora. Bæjarar fengu tvö en PSG eitt en markverðirnir voru vel á verði.

Heimamenn náðu að jafna metin eftir klukkutíma leik. Joshua Kimmich gaf þá frábæra aukaspyrnu inn á teiginn og þar var Thomas Muller mættur. Stangaði sá þýski boltann í netið og allt jafnt.

Kylian Mbappe hélt áfram í síðari hálfleik og hann skoraði þriðja mark PSG á 68. mínútu er hann skoraði með frábæru skoti á nærstöngina.

Bæjarar voru ekki hættir. Þeir fengu færi eftir færi til þess að jafna metin en allt kom fyrir ekki og lokatölur 2-3 sigur gestanna.

Samkvæmt Livescore átti Bayern 23 skot í átt að marki PSG en PSG skaut sex sinnum í átt að marki Bæjara og skoraði þrjú mörk.

Síðari leikur liðanna fer fram í París í næstu viku.