Björgunarsveitir verða að henda partíbyssunum

Slysavarnarfélaginu Landsbjörg hefur verið gert að farga svokölluðum „partíbyssum“ og „partíbyssufyllingum“ sem það hafði til sölu. Landsbjörg hefur jafnframt verið bannað að selja vörurnar því slysavarnarfélaginu tókst ekki að sýna fram á öryggi þeirra.

Málið má rekja til loka síðasta árs, þegar björgunarsveitirnar starfræktu árlega flugeldamarkaði. Á sölustað Landsbjargar við Grandagarð í Reykjavík segjast eftirlitsmenn Neytendastofu hafa gengið fram á umrædda partíbyssu og fyllingar sem báru engar merkingar um hvaða flokk skotelda vörurnar tilheyrðu.

Því kallaði Neytendastofa eftir gögnum frá Landsbjörg um partíbyssuna, sem stofnunin taldi fyrst að væri skoteldur, auk þess að setja á tímabundið sölubann. Björgunarsveitirnir sögðu hins vegar að um leikfang væri að ræða og kannaði Neytendastofa því hvort vörurnar uppfylltu öryggiskröfur sem gerða eru til leikfanga.

Kom þá í ljós að partíbyssan var CE-merkt og því framleidd í samræmi við tilskipanir Evrópusambandsins en partíbyssufyllingarnar ekki, en eins og nafnið gefur til kynna á að nota fyllingarnar með byssunni. Neytendastofa taldi því að fyllingarnar þyrftu líka að vera framleiddar samkvæmt fyrrnefndum tilkskipunum og kallaði eftir ítarupplýsingum frá Landsbjörg sem stofnunin segir að hafi ekki borist.

Neytendastofa komst því að þeirri niðurstöðu að Landsbjörg hafi mistekist að sýna fram á öryggi umræddra vara. Því var slysavarnarfélaginu bannað að selja vörurnar og gert að eyðileggja öll eintök þeirra innan sex vikna. Ef Landsbjörg fer ekki að fyrirmælum Neytendastofu gæti félagið átt yfir höfði sér 50 þúsund króna dagsektir.