Látinn laus eftir samræður við lögreglu

Upplýsingar bárust lögreglunni um meintar hótanir um hádegisbil. Lögreglan hefur síðan þá rætt við manninn og telur, eftir þær samræður, að engin ástæða sé til grípa til ráðstafana. Þetta kemur fram í tilkynningu frá Kristjáni Ólafi Guðnasyni, yfirlögregluþjóni á Austurlandi.

Ríkislögreglustjóri hefur þá sagt við fjölmiðla í dag að ekki sé talin hætta á ferðum.

Ræddi við Björn Leví símleiðis þegar lögreglu bar að garði

Björn Leví Gunnarsson, þingmaður Pírata, segir frá því á Facebook síðu sinni nú síðdegis að umræddur maður hafi hringt í hann í dag til að útskýra mál sitt. Símtalið hafi staðið yfir þegar lögreglu bar að garði hjá manninum fyrr í dag.

Björn segir að manninum hafi augljóslega verið mikið niðri fyrir. Hann væri svekktur vegna aðgerðaleysis stjórnvalda. Að hans mati hefði mátt sjá skriðuföllin fyrir því fyrir tveimur árum hafi verið haldinn fundur um mögulegar aurskriður fyrir austan. Fólk hafi vitað að þetta gæti gerst en að ekkert hafi verið gert til að koma í veg fyrir hamfarirnar.

Í eyrum Björns hafi maðurinn hljómað eins og áhyggjufullur íbúi Seyðisfjarðar sem hafi þrátt fyrir aðstæður útskýrt málið á yfirvegaðan en tilfinningaþrunginn hátt.

Gagnrýnt viðbrögð stjórnvalda

Karlmaðurinn er íbúi á Seyðisfirði og heitir Jonathan Moto Bisagni. Hann segist hafa hringt í nokkra þingmenn í morgun og Elizu Reid forsetafrú vegna hamfaranna á Seyðisfirði. Í framhaldi af þeim símtölum hafi hann verið handtekinn, að eigin sögn. Lögregla segist hafa rætt við Jonathan.

Hann hefur átalið stjórnvöld fyrir viðbrögð við skriðunum á Seyðisfirði.

„Það féllu aurskriður að húsinu mínu, þar sem við og krakkarnir mínir voru, og við þurftum að yfirgefa húsið á þriðjudag, en samt var bærinn ekki rýmdur þegar skriðuföllin komu á fimmtudag. Það þýðir ekki að segja að menn hafi ekki getað vitað þetta þegar svona úrkoma kemur á örfáum dögum,“ sagði Jonathan í viðtali við Morgunblaðið á sunnudaginn.

Þá gerði hann athugasemdir við að forsætisráðherra hefði sagt að Íslendingar stæðu saman á þessum tímum.

„Mikið af fólkinu hérna eru ekki Íslendingar,“ sagði Jonathan sem er bandarískur en af ítölskum og japönskum uppruna. Hann kom fyrst til Seyðisfjarðar 2015 og hefur búið þar síðan 2018.

Jonathan segir í samtali við Mbl.is síðdegis að lögreglan í Reykjavík hafi hringt í sig og tjáð honum að hann hefði hótað Katrínu Jakobsdóttur forsætisráðherra. Þess vegna vildi lögreglan á Seyðisfirði ná af honum tali. Hann kannaðist ekki við það að hafa hótað neinum.

Forsætisráðherra ekkert tjáð sig

Katrín Jakobsdóttir forsætisráðherra vildi ekki tjá sig um málið við fréttamenn fyrr í dag og kemur ekki inn á það í stöðuuppfærslu á Facebook síðdegis. Málið virðist því ekki hafa fengið mikið á hana eftir nokkra uppákomu í hádeginu í upplýsingamiðstöðinni á Seyðisfirði.

„Heimsóttum Seyðisfjörð og Egilsstaði í dag. Ummerkin eftir skriðuföllin eru sláandi enda líklega umfangsmestu skriður í mörg hundruð ár. En um leið er það ótrúlegt að ekki hafi orðið manntjón og gengur reyndar kraftaverki næst,“ segir Katrín. 

„Ræddum við íbúa sem sumir hverjir hafa enn ekki fengið að snúa heim. Allir voru þeir æðrulausir gagnvart hrikalegri stöðu og hlýja og samstaða alltumlykjandi. Unnið er að rannsóknum á fjallinu. Við blasir hreinsunarstarf og uppbygging en Seyðfirðingar horfa til framtíðar. Við förum saman í þetta verkefni.“