Beitir búinn að vera glíma við meiðsli í baki

Beitir Ólafsson, markvörður Íslandsmeistara KR, hefur verið að glíma við meiðsli í baki en ætti að vera tilbúinn er liðið kemur heim úr æfingarferð sinni nú í vor. Hann hefur ekkert leikið með liðinu það sem af er ári en liðið er sem stendur með fullt hús stiga eftir fjóra leiki á Reykjavíkurmótinu.

Guðjón Orri Sigurjónsson, sem gekk til liðs við KR í vetur, hefur til þessa leikið alla leiki liðsins á Reykjavíkurmótinu. Beitir er samkvæmt heimildum Vísis að glíma við meiðsli í baki en reiknað er með því að hann verði orðinn klár eftir æfingaferð liðsins nú í vor. Eins og svo oft áður heldur KR liðið til heitu landanna líkt og svo mörk fótboltalið hér á landi.

Beitir átti frábært tímabil í marki KR í fyrra en liðið fékk aðeins á sig 23 mörk í 22 leikjum, fæst allra í deildinni. Þar spilaði Beitir stóra rullu en fyrir tímabilið sagði Rúnar Kristinsson, þjálfari liðsins, að Beitir væri besti markvörður deildarinnar.

Beitir tók það til sín og átti frábært tímabil, vonandi fyrir KR að þessi meiðsli verði að baki sem fyrst og hann komi tvíefldur til baka.

Beitir Ólafsson, skólastjóri gamla skólans, herðir skrúfurnar með röratöng sem hann sótti í rassvasann. Eðlilega. pic.twitter.com/DwM88N84ey

— Björgvin Stefánsson (@badgalbjoggi) May 15, 2019