KR endurheimtir miðvörð

Arnór Sveinn Aðalsteinsson er orðinn heill heilsu samkvæmt vef KR og mun vera í leikmannahópi KR er liðið sækir ÍA heim í kvöld.

Mikil meiðsli hafa herjað á varnarmenn KR að undanförnu en Gunnar Þór Gunnarsson sleit krossband í bikarleiknum gegn Vængjum Júpiters fyrr í vikunni.

Hinn efnilegi Finnur Tómas Pálmason er einnig á meiðslalistanum hjá KR og því mikilvægt fyrir Rúnar Kristinsson að endurheimta Arnór Svein fyrir kvöldið.

KR steinlá fyrir HK í síðustu umferð Pepsi Max-deildarinnar á meðan ÍA tapaði fyrir FH á útivelli.

Leikur ÍA og KR er í beinni útsendingu á Stöð 2 Sport í kvöld og hefst útsending frá Akranesi klukkan 19.00.