„Ég er með full­komnunar­á­ráttu“

„Þið þekkið mig og ég er með fullkomnunaráráttu og mér fannst við gera þó nokkur mistök. Ég var ánægður með það sem stelpurnar lögðu í leikinn. Orkan var góð og í seinni hálfleik spiluðum við betri vörn,“ sagði Jamil eftir leik.

Jamil var ekkert svakalega sáttur með fyrri hálfleik liðsins en Valur var fjórum stigum yfir í hálfleik 40-36.

„Við vorum einhverjum þrettán stigum yfir á tímabili en svo gáfum við forskotið frá okkur. Við vorum að tapa boltanum mikið og ef við förum að passa betur upp á boltann þá verðum við betra lið.“

Aðspurður út í þriðja leikhluta sem Valur vann 21-12 var Jamil ánægður með varnarleik liðsins.

„Það var mikil orka í okkur í þriðja leikhluta og stelpurnar urðu harðari og ég var ánægður með hvernig liðið kom út í seinni hálfleik.“

Valur fékk ekki stig af bekknum og Jamil viðurkenndi að það hafi verið vonbrigði.

„Þær sem voru á bekknum spiluðu ekki það mikið. Ég hef verið að segja byrjunarliðinu að það er þeirra starf að koma varamönnunum inn á með því að spila vel og þá fá fleiri stelpur tækifæri,“ sagði Jamil að lokum.