Allt það helsta um fyrir­komu­lag Ferða­gjafarinnar

Hægt verður að skipta ferðagjöf stjórnvalda niður og nýta hana innan fjölbreyttrar flóru ferðaþjónustufyrirtækja með sérstöku smáforriti sem hannað var til verksins. Kaupa má áfengi á skemmtistað fyrir inneignina, að því gefnu að staðurinn uppfylli skilyrði stjórnvalda til nýtingar gjafarinnar. Gildistími inneignarinnar rennur út í lok árs og þá verður fyrirtækjum ekki heimilt að taka við meira en 100 milljónum í formi ferðagjafa.

Þetta kom fram á kynningarfundi ráðherra, ferðaþjónustunnar og Stafræns Íslands á útfærslu Ferðagjafarinnar, fimm þúsund króna inneign sem útgefin verður af stjórnvöldum til einstaklinga 18 ára eða eldri, þ.e. fædda 2002 og fyrr, með íslenska kennitölu. Einblínt er á að gjöfin verði nýtt í samgöngur, gistingu, veitingar og afþreyingu um allt land.

Veitingastaðir, söfn og bílaleigur

Þórdís Kolbrún Reykfjörð Gylfadóttir, ferðamála- og nýsköpunarráðherra, lagði frumvarpið um ferðagjöfina fram á Alþingi í síðustu viku og það gekk til nefndar í gær.

Í frumvarpinu um gjöfina, sem og á kynningarfundinum í morgun, er m.a. kynnt hvaða skilyrði fyrirtæki þurfa að uppfylla til að geta tekið við gjöfinni. Þannig verður hægt að nota gjöfina hjá fyrirtækjum sem uppfylla eitt af eftirfarandi skilyrðum og hafa starfsstöð á Íslandi:

1. Fyrirtæki með gilt leyfi Ferðamálastofu
2. Fyrirtæki með gilt rekstrarleyfi skv. 7. gr. laga um veitingastaði, gististaði og skemmtanahald
3. Fyrirtæki með gilt starfsleyfi frá viðeigandi heilbrigðisnefnd sem hefur verið gefið út vegna veitingastaða í flokki I, sbr. 3. mgr. 4. gr. laga um veitingastaði, gististaði og skemmtanahald
4. Ökutækjaleigum með gilt starfsleyfi frá Samgöngustofu skv. 1. mgr. 3. gr. laga um leigu skráningarskyldra ökutækja
5. Söfnum og fyrirtækjum sem bjóða sýningu gegn endurgjaldi þar sem áhersla er á íslenska menningu, sögu eða náttúru.

Þá var jafnframt kynnt á fundinum að hægt yrði að nota gjöfina hjá atvinnurekstri á borð við baðstofur, gufubaðstofur, götuleikhús, tívolí, útihátíðir og tjald- og hjólhýsasvæði.

Fá ekki meira en 25 milljónir

Frumvarpið miðar jafnframt við að hvert fyrirtæki geti að hámarki tekið við 100 milljónum króna í greiðslu í formi ferðagjafa. Þá getur fyrirtæki sem „metið var í rekstrarerfiðleikum 31. desember 2019“, líkt og segir í frumvarpinu, ekki tekið við meira en 25 milljóna ferðagjafagreiðslu.

Einstaklingum er jafnframt heimilt að gefa eigin ferðagjöf, þ.e. framselja hana til einhvers annars. Einn einstaklingur getur þó ekki greitt með fleiri en 15 ferðagjöfum. Gildistími ferðagjafa er frá útgáfudegi til og með 31. desember 2020. Ekki myndast inneignarréttur eftir að gildistími rennur út, að því er fram kom á fundinum í morgun.

Strikamerki í smáforriti

En hvernig geta einstaklingar og fyrirtæki nálgast gjöfina og greitt með henni? Svör við þessu útlistaði Andri Heiðar Kristinsson framkvæmdastjóri Stafræns Íslands, sem fer meðal annarra með umsjón verkefnisins, á kynningarfundinum nú í morgun.

Einstaklingar geta nálgast ferðagjöfina í gegnum vefsíðuna Ísland.is í byrjun júní en nákvæm dagsetning var þó ekki nefnd á fundinum. Þá er gert ráð fyrir þremur leiðum til að taka við gjöfinni:

1. Skanna strikamerki með sérstöku smáforriti, sem íslenska frumkvöðlafyrirtækið YAY! Þróar. Notandi sýnir strikamerki í gegnum appið og viðkomandi ferðaþjónustuaðili getur skannað það inn, annað hvort með kassakerfi sínu eða með sérstöku skönnunarsmáforriti sem hægt verður að hlaða niður í síma.
2. Slá inn númer gjafabréfs í vafra.
3. Beintenging við bókunarkerfi viðeigandi ferðaþjónustufyrirtækis. Mörg kerfi eru þegar tengd en það verður sett í hendur fyrirtækjanna sjálfra hvort þau vilji nýta sér þetta – og það ætti ekki að vera flókið, að sögn Andra.

Aukagjöf frá fyrirtækjum verði möguleiki

Hægt verður að skipta gjöfinni niður eins oft og hver og einn vill. Ferðaþjónustufyrirtækin slá þá inn þá upphæð sem nýtt er af gjöfinni hverju sinni.

Þá verður öðrum fyrirtækjum einnig gert kleift að gefa starfsfólki eigin ferðagjöf til viðbótar við inneign stjórnvalda í gegnum sama kerfi. Fyrirtæki eru hvött til að hafa samband við skipuleggjendur til að koma því í kring.

Þá kom fram á fundinum að ferðagjöfinni væri ekki ætlað að styðja við opinbera aðila eins og sundlaugar. Markmiðið væri að styðja við einkarekna aðila. Einnig var sérstaklega spurt hvort hægt væri að nota gjöfina til að kaupa áfengi á skemmtistað og það er leyfilegt, að því gefnu að viðkomandi staður uppfylli áðurnefnd skilyrði fyrirtækja.

Ferðaþjónustufyrirtæki sem uppfylla skilyrðin og vilja geta tekið við gjöfinni skulu skrá sig á Ísland.is. Skráningin opnar á næstu dögum. Þá verður vefnum Ferðalag.is hleypt fljótlega af stokkunum, þar sem unnt verður að finna upplýsingar um þá staði sem taka við gjöfinni.

Þá kom fram í máli Andra að uppgjör ætti að vera einfalt þegar búið er að nota ferðagjöfina. Fyrirtækin sendi mánaðarlegan rafrænan reikning fyrir heildarnotkun og fá greitt mánaðarlega. Greiðsla á að berast fljótt, að sögn Andra. 

Upptöku af fundinum í morgun má nálgast í heild hér að neðan.