Vetrarsólstöðuganga Pieta fer fram í fjórða sinn

Pieta samtökin standa fyrir vetrarsólstöðugöngu klukkan 20 í kvöld þar sem gengið verður frá húsnæði Kynnisferða að Klettagörðum 12 að vitanum við Skarfaklett. Að sögn skipuleggjenda er stefnt að því að eiga fallega samverustund á dimmasta kvöldi ársins.

Þetta er í fjórða sinn sem vetrarsólstöðugangan fer fram. Benedikt Guðmundsson, einn umsjónarmanna gönguna, segir þetta tækifæri fyrir fólk til þess að flýja stressið sem fylgir jólunum og eiga notalega stund. Þá sé einnig vitað að hátíðirnar geti verið erfiður tími fyrir þá sem syrgja ástvini.

„Við hittumst fyrst í húsnæði Kynnisferða og þar verður boðið upp á heitt kakó og kleinur. Þar verða fluttar nokkrar ræður og Gissur Páll mun syngja nokkur lög áður en gangan leggur af stað að vitanum,“ segir Benedikt í samtali við Vísi.

Frá Klettagörðum verður gengið með blys að vitanum. Við vitann verður svo minningarstund þar sem kveikt verður á kertum og verður hægt að kaupa kerti á staðnum til styrktar Pieta.

Göngufólki mun bjóðast að skrifa minningarorð um ástvini á svokallaða minningarplötu. Minningarplatan verður á vitanum fram yfir áramót svo ástvinir geti farið að vitanum yfir hátíðirnar til þess að minnast ástvina.

Að sögn Benedikts hafa þrjú til fjögur hundruð manns tekið þátt í göngunni í ár og er búist við svipuðum fjölda í ár. Þau vekja athygli á því að allir eru velkomnir í gönguna.