Lögreglan með allar klær úti í vændis- og mansalsmálum

Í nýrri afbrotaskýrslu lögreglunnar á höfuðborgarsvæðinu kemur fram kynferðisbrotamálum hafi fjölgað töluvert í maímánuði. Karl Steinar Valsson, yfirlögregluþjónn hjá miðlægri rannsóknardeild lögreglunnar segir allar klær vera úti í vændis- og mansalsmálum sem útskýri fjölgunina.

Á fjórða tug vændiskaupenda hafa verið kallaðir inn að sögn Karls Steinars. Karl Steinar segir að það sé mýta að kaupendur séu mestmegnis erlendir karlmenn í viðskiptaferðum heldur séu kaupendur í flestum tilfellum íslenskir karlmenn af öllum stigum samfélagsins. Vændiskonur og vændiskarlar séu hins vegar í flestum tilfellum erlendir aðilar.

„Við höfum verið að horfa til þessara verkefna í svolítinn tíma þó svo við kjósum að greina frá því núna. Vændis- og mansalsmál eru samofin og eru bara ein birtingarmyndin af skipulagðri glæpastarfsemi,“ segir Karl og segir lögregluna vera í samstarfi við erlenda lögreglu sem tengist inn á skipulagða glæpastarfsemi.

Kaupendur í langflestum tilfellum íslenskir karlar

Karl segir að vændisiðnaðurinn hérlendis sé í takt við það sem lögreglan hefur áður bent á. „Þetta eru mestmegnis konur, ekki allt, sem hér bjóða vændi. Við höfum verið að fylgjast með fjöldanum og hann rokkar upp og niður. Þá virðist vera sem að einstaklingar séu að koma til landsins aftur og aftur. Fjöldinn fer frekar hækkandi en lækkandi, segir Karl.

Í flestum tilvikum hérlendis eru þeir einstaklingar sem koma til landsins og bjóða vændi eru erlendir og með erlendar tengingar en kaupendurnir eru langflestir íslenskir karlar.

Karl segir að lögregla nálgist stóran hluta vændismála út frá því að það sé möguleg mansalstenging að baki. „ Í sumum tilvikum teljum við að svo sé þó svo að okkur takist ekki að sýna fram á það. Það er mjög algengt í þessari brotastarfsemi að þeir sem við lítum á sem hugsanlega þolendur mansals líta ekki svo á hlutina. Það er hluti af þeim vandamálum sem við og lögregla um allan Evrópu erum að glíma við í þessum málum, segir Karl.

Þýðir ekki að ráðast á einn þátt í skipulagðri brotastarfsemi

Karl segir að áfram verði haldið með vinnuna sem nú er hafin, „Við lifum hins vegar við það að það er mikið annríki hjá lögreglunni þannig að við komumst aldrei yfir allt sem við viljum gera, að okkar mati er ákveðinn þáttur hjá okkur er að hafa snertiflöt á kaupendum, þolendum, vinnum að því að fá vefsíðum þar sem boðið er upp á vændi lokað, og vinnum með þeim sem eiga húsnæði þar sem vændi fer fram. Við erum raunverulega að reyna að nálgast allar birtingarmyndirnar eins og við getum. Þetta er skipulögð brotastarfsemi og þess vegna þýðir ekki að ráðast bara á einn þátt,“ segir Karl Steinar sem segir að mögulega væri hægt að ná í hundruð kaupenda í hverjum mánuði en það myndi eflaust skila litlu í heildarbaráttunni.

„Við erum í raun með allar klær úti, þetta er ekki einfalt og tekur tíma,“ segir Karl Steinar Valsson, yfirlögregluþjónn hjá miðlægri rannsóknardeild lögreglunnar á höfuðborgarsvæðinu.