Aðstoðarvarnarmálaráðherra Srí Lanka segir að hryðjuverkaárásin á páskadag hafi verið hefndaraðgerð vegna hryðjuverkaárásarinnar á moskurnar í Christchurch á Nýja-Sjálandi í síðasta mánuði.
Frá þessu greindi aðstoðarráðherrann í ræðu á þinginu í morgun og vísaði hann í frumniðurstöður rannsóknar yfirvalda.
Alls eru 321 maður látinn og um fimm hundruð særðir eftir að ráðist var á þrjár kirkjur og þrjú fimm stjörnu hótel á Srí Lanka á páskadag
„Bráðabirgðaniðurstöður rannsóknarinnar hafa leitt í ljós að það sem gerðist á Srí Lanka var hefnd vegna árásarinnar gegn múslimum í Christchurch,“ sagði aðstoðarvarnarmálaráðherrann Ruwan Wijewardene.
Yfirvöld á Srí Lanka hafa sakað hryðjuverkahópinn National Thowheed Jamaath um árásirnar og er talið að hópurinn hafi notið aðstoðar alþjóðlegra hryðjuverkasamtaka. Alls hafa um fjörutíu manns verið handteknir vegna árásarinnar.
Ástralinn Brenton Tarrant hefur verið ákærður vegna árásar á tvær moskur í Christchurch þann 15. mars síðastliðinn. Alls létu fimmtíu manns lífið í árásunum og á fjórða tug særðust.
Segir árásina hefnd vegna árásarinnar í Christchurch
Tengdar fréttir
Ríkasti maður Danmerkur missir þrjú barna sinna á Srí Lanka
Þrjú af fjórum börnum danska milljarðamæringsins Anders Holch Povlsen létust í sprengjuárásunum á Srí Lanka í gær.
Segja öfgasamtök með alþjóðlega tengingu bera ábyrgð á hryðjuverkunum
Að minnsta kosti 290 létust í þessum árásum á kirkjur og hótel og eru fimm hundruð særðir.
Fjörutíu handteknir á Srí Lanka
Fjörutíu voru handteknir á Srí Lanka í nótt eftir að neyðarástand tók þar gildi og lögregla reynir að hafa hendur í hári þeirra sem skipulögðu sprengjuárásirnar í landinu um páskana.
