Forstjóri Isavia lætur af störfum

Björn Óli Hauksson hefur sagt starfi sínu sem forstjóri Isavia lausu og lætur þegar af störfum. Í tilkynningu frá Isavia kemur fram að Elín Árnadóttir, aðstoðarforstjóri, og Sveinbjörn Indriðason, framkvæmdastjóri fjármálasviðs, muni annast daglegan rekstur þar til nýr forstjóri hefur verið ráðinn.

Haft er eftir Birni Óla í tilkynningunni að hann telji nú góðan tíma til að nýtt fólk taki við keflinu af honum. Björn Óli hefur verið forstjóri Isavia frá stofnun árið 2010.

Áður starfaði Björn Óli sem forstjóri Keflavíkurflugvallar ohf. 2008-10 og leiddi umfangsmikla sameiningu Flugmálastjórnar Keflavíkurflugvallar, Flugstöðvar Leifs Eiríkssonar og flugöryggisvarðadeildar lögreglustjórans á Suðurnesjum, að því er segir á vef Isavia. Þar áður vann hann í sex ár að uppbyggingu flugmála í Kósóvó, meðal annars sem forstjóri Pristinaflugvallar og sem verkefnisstjóri þar á vegum Flugmálastjórnar Íslands og Flugstoða ohf.

Hann setti meðal annars á laggirnar flugmálastjórn Sameinuðu þjóðanna í Kósóvó (CARO - UNMIK Civil Aviation Regulatory Office) og átti þátt í að sameina og byggja upp fyrirtæki um flugvallar- og flugstöðvarrekstur í Pristina.