Köld nótt að baki hjá mótmælendum sem gistu á Austurvelli

Mótmælendur, sem síðustu daga hafa mótmælt aðstæðum hælisleitenda hér á landi, gistu á Austurvelli í nótt. Elínborg Harpa Önundardóttir aktívisti hjá No Borders Iceland segir að nóttin hafi verið köld en mótmælendur vinna nú að því að sækja um leyfi fyrir uppsetningu á tjöldum á Austurvelli.

Sjá einnig: Ætla að gista á Austurvelli: „Gæti orðið kalt, sérstaklega þegar við hættum að dansa“

Elínborg var stödd hjá Reykjavíkurborg að sækja um leyfi fyrir tjöldunum þegar Vísir náði tali af henni í morgun. Hún segir málið ganga hægt.

„Hérna í Reykjavíkurborg fáum við bara mjög „bjúrókratískt“ svar um að þetta verði allt að vera í ferli og að það verði að vera komin umsögn um beiðnina okkar áður en við fáum svar. Og ég spurði hver eigi að gera þessa umsögn en þá er mér bara sagt að þau viti það ekki og ég spurði hvort ég gæti þá talað við einhvern sem viti það. Þá er mér sagt að hringja á  símatíma, sem er á eftir og sem við munum alveg gera, en það væri óskandi að fá að tala við einhvern,“ segir Elínborg.

„Af því að fólk er í viðkvæmri stöðu og mjög viðkvæmri heilsufarslegri stöðu, sérstaklega í ljósi þess að það hefur fengið gífurlega lélega heilbrigðisþjónustu hingað til.“

Elínborg var ein þeirra sem dvaldi á Austurvelli í nótt. Greint var frá því í gærkvöldi að mótmælendur hefðu verið í góðum gír framan af kvöldi en Elínborg ítrekar að enn sé brýn þörf á teppum, svefnpokum, sængum og mat handa mótmælendum ef fólk hefur tök á að koma með slíkt.

„Það var bara kalt, sérstaklega eftir að það var slökkt á tónlistinni. Við dönsuðum í okkur hita til fimm mínútur í ellefu, þá slökktum við sjálf á tónlistinni. Svo reyndum við að spila fótbolta og hanga, en við sendum fólk líka heim í hollum til að hlýja sér. En flóttafólkið sjálft, sérstaklega þeir sem eiga heima á Ásbrú, það kemst ekki neitt og vill ekki fara neitt. En margir voru líka vakandi alla nóttina.“

Elínborg segir að mótmælunum verði haldið áfram þangað til yfirvöld verða við beiðni mótmælenda um að útnefna samningsaðila til að hitta fulltrúa frá hælisleitendum á nokkrum fundum.

„Í rauninni erum við að líta til módelsins sem verkalýðshreyfingin er með.“

Þess sé jafnframt krafist að málum fólksins verði komið í almennilegan farveg, og þá er enn staðið við þær fimm kröfur mótmælenda sem þegar hefur verið greint frá. Þær snúa m.a. að því að stöðva brottvísanir flóttafólks, veita því aðgang að heilbrigðisþjónustu og loka flóttamannabúðunum að Ásbrú.

Elínborg segir fund hælisleitenda með forsætisráðuneytinu í gær hafa verið „hálfgerða leiksýningu“ en þar báðu hælisleitendur um að tímabundin stöðvun yrði sett á brottvísanir á meðan verið væri að koma samninganefnd á fót. Þeim hafi hins vegar verið greint frá því að það væri ekki hægt.

„Og það var eiginlega bara allt „ekki hægt“,“ segir Elínborg um fundinn í gær.