Langar raðir vegna frosinna salerna

Vegna mikils kulda á landinu hafa lagnir í salernum á ferðamannasvæðinu við Jökulsárlón frosið. Starfsfólk Vatnajökulsþjóðgarðar greindi frá aðstæðum á Facebook í dag.

Steinunn Hödd Harðardóttir, aðstoðarmaður þjóðgarðsvarðar sagði í samtali við mbl.is í dag að lagnirnar hafi verið frosnar í einhvern tíma og óvíst sé hversu lengi ástandið muni vara.

Vegna aðstæðnanna er einungis eitt salerna á svæðinu nothæft og hafa af þeim sökum myndast miklar raðir þegar margt er um manninn á svæðinu. Frá þessu er greint í Facebook hópnum Bakland Ferðaþjónustunnar.

Sé litið á veðurspá Veðurstofu má sjá að búist er við áframhaldandi kulda á Suðausturlandi.