Stelpurnar léttu álögunum af íslenska landsliðsbúningnum

Stelpurnar náðu því í fyrstu tilraun sem strákarnir hafa beðið eftir í meira en þrjúhundruð daga.

Íslenska kvennalandsliðið náði sögulegum sigri á La Manga í gær því þetta var fyrsti sigur A-landsliða Íslands í nýja landsliðsbúningnum sem aðeins karlalandsliðið fékk að spila í á árinu 2018.

HM-búningur íslenska landsliðsins var frumsýndur um miðjan mars í fyrra og fyrsti leikur karlalandsliðsins í búningnum var á móti Mexíkó í vináttulandsleik í Santa Clara í Bandaríkjunum 23. mars 2018.

Síðan eru liðnir 305 dagar og karlalandsliðið hefur spilað fimmtán leiki í búningnum án þess að ná að vinna leik.

Liðið hefur vissulega gert jafntefli á móti Argentínu (1-1 á HM) og á móti nýkrýndum heimsmeisturum Frakka (2-2 í vináttulandsleik) en níu af fimmtán leikjum hafa tapast og liðið er enn að bíða eftir fyrsta sigrinum.

Íslensku stelpurnar frumsýndu ekki bara nýja þjálfarann í gær heldur var þetta líka fyrsti leikur liðsins í nýju búningunum.

Það var ekki að spyrja því að þrátt fyrir að hafa spilað sinn fyrsta leik í búningnum 304 dögum á eftir körlunum þá voru stelpurnar okkar á undan að vinna fyrsta leikinn.

Elín Metta Jensen skoraði bæði mörk, fyrst eftir sendingu Öglu Maríu Albertsdóttur og svo eftir undirbúning Berglindar Bjargar Þorvalsdóttur.

Leikir íslensku landsliðanna í HM-búningi Errea Sport:

15. mars 2018: Nýr landsliðsbúningur kynntur

23. mars 2018: Karlandsliðið tapaði 3-0 á móti Mexíkó

27. mars 2018: Karlandsliðið tapaði 3-1 á móti Perú

2. júní 2018: Karlandsliðið tapaði 3-2 á móti Noregi

7. júní 2018: Karlandsliðið gerði 2-2 jafntefli við Gana

16. júní 2018: Karlandsliðið gerði 1-1 jafntefli við Argentínu (HM)

22. júní 2018: Karlandsliðið tapaði 2-0 á móti Nígeríu (HM)

26. júní 2018: Karlandsliðið tapaði 2-1 á móti Króatíu (HM)

8. september 2018: Karlandsliðið tapaði 6-0 á móti Sviss (Þjóðadeildin)

11. september 2018: Karlandsliðið tapaði 3-0 á móti Belgíu (Þjóðadeildin)

11. október 2018: Karlalandsliðið gerði 2-2 jafntefli við Frakkland

15. október 2018: Karlandsliðið tapaði 2-1 á móti Sviss (Þjóðadeildin)

15. nóvember 2018: Karlandsliðið tapaði 2-0 á móti Belgíu (Þjóðadeildin)

19. nóvember 2018: Karlalandsliðið gerði 2-2 jafntefli við Katar

11. janúar 2019: Karlalandsliðið gerði 2-2 jafntefli við Svíþjóð

15. janúar 2019: Karlalandsliðið gerði 0-0 jafntefli við Eistland

21. janúar 2019: Kvennalandsliðið vann 2-1 sigur á Skotlandi