WOW flýgur aftur til Ísraels

WOW air mun fljúga á ný til Tel Aviv í Ísrael. Flogið verður þangað fjórum sinnum í viku; á þriðjudögum, miðvikudögum, fimmtudögum og laugardögum. Í tilkynningu frá flugfélaginu segir að flug til borgarinnar hefjist 11. júní og standi út október 2019.

Haft er eftir Skúla Mogensen, forstjóra og stofnanda WOW, í tilkynningunni að aðstandendur flugfélagsins séu ánægðir að geta hafið flug til Ísrael að nýju. „Við finnum fyrir miklum áhuga á flugleiðinni. Bæði hafa Ísraelar mikinn áhuga á að heimsækja Ísland auk þess sem tengingin við Norður-Ameríku undirstrikar okkar sérstöðu á markaðnum,“ segir Skúli.

WOW hóf áætlunarflug til Tel Aviv í september í fyrra og þótti það gagnrýnivert. Þannig sagði félagið Ísland-Palestína að áætlunarflug WOW til Ísraels væri siðferðislega vafasamt.

Flugtíminn frá Íslandi til Tel Aviv er í kringum sjö klukkustundir en flugmiðasala til borgarinnar er sögð hefjast á morgun, miðvikudag.